ប្រធានចាប់គូ នៅសង្វៀនគ្រុឌគុនខ្មែរ ៖ កីឡាករ បរទេស ដែលមកដណ្ដើមខ្សែក្រវាត់ពី ឃីម បូរ៉ា គឺតម្រូវប្រកួត លក្ខណៈ ៥ទឹក..!
កីឡា ៖ ប្រធានចាប់គូនៅសង្វៀនគ្រុឌគុនខ្មែរ លោក ម៉ុល នី សរសេរបញ្ជាក់នៅលើហ្វេសប៊ុកផ្លូវការ នៅថ្ងៃទី៥ ខែមេសា ឆ្នាំ២០២៥ ថា ៖ ដើម្បីចូលរួមជួយលើកកម្ពស់គុនខ្មែរ និងចង់ឲ្យកីឡាករ គុនខ្មែរ ទាំងអស់ មានការរីកចម្រើន ព្រមទាំងចង់ឃើញម្ចាស់ខ្សែក្រវាត់មានសមត្ថភាពពិតប្រាកដ ខ្ញុំបាទ និងក្រុមការងារ បានកំណត់ឲ្យ កីឡាករបរទេស ដែលមកដណ្ដើមខ្សែក្រវាត់ពី ឃីម បូរ៉ា វាយលក្ខណៈ៥ទឹកវិញ ។
សូមបញ្ជាក់ថា ខ្សែក្រវាត់នេះ បូរ៉ា ដណ្ដើមបានពីកីឡាករចិន ប្រកួតលក្ខណៈ៣ទឹកប៉ុណ្ណោះ។ ចំណុចនេះ ខ្ញុំសូមរំលឹកទៅកាន់ការប្រកួតដណ្ដើមខ្សែក្រវាត់នេះ ជាមួយកីឡាករចិនបន្តិច កាលនោះយើងគ្រោងដាក់ឲ្យអ្នកទាំងពីរប្រកួតលក្ខណៈ៥ទឹកដែរ តែដោយសារតែកាលនោះ បូរ៉ា ខកខានឡើងប្រកួតយូរ ហើយយើងខ្លាចប៉ះពាល់ដល់ការប្រកួតក៏ដាក់ឲ្យប្រកួតត្រឹម៣ទឹកទៅ យ៉ាងណាពេលនេះ បូរ៉ា គ្នាបានប្រកួតញឹកញាប់វិញហើយ ទើបយើងសម្រេចដាក់ឲ្យវាយ៥ទឹកតែម្ដង។
លោក ម៉ុល នី បន្តថា ការកែប្រែនេះសង្ឃឹមបងប្អូនអ្នកគាំទ្រគុនខ្មែរទាំងអស់ មេត្តាជ្រាបជាដំណឹង ព្រោះកន្លងមកខ្ញុំ ធ្លាប់បានប្រកាសម្ដងហើយស្ដីពីការកែប្រែក្នុងកម្មវិធីប្រកួតដណ្ដើមខ្សែក្រវាត់នានា៕
អរគុណ!
