ក្រោមឥទ្ធិពលជាតិស្រវឹង ០.៤៧ បុរសម្នាក់ ថតឡាយ ធ្វើឲ្យប៉ះពាល់កិតិ្តយសសេចក្តីថ្លៃថ្នូរសមត្ថកិច្ចគោល ដៅអនុវត្តច្បាប់នៅខណ្ឌដង្កោ

ភ្នំពេញ ៖ បុរសម្នាក់ក្រោមឥទ្ធិពលជាតិស្រវឹងកម្រិត ០.៤៧ បានថតឡាយសមត្ថកិច្ចកំពុងអនុវត្តច្បាប់នៅខណ្ឌដង្កោ ដែលការថតឡាយនេះត្រូវបានហាមឃាត់គ្រប់គោលដៅទាំងអស់ក្នុងរាជធានី។

ហេតុការណ៍នេះបានកើតឡើងនៅវេលាម៉ោង២៣និង៤៣នាទីយប់ ថ្ងៃទី០៤ ខែមីនា ឆ្នាំ២០២៥ នៅលើដង ផ្លូវ២១៧ មុខសាលាខណ្ឌដង្កោ ភូមិថ្មី សង្កាត់ដង្កោ ខណ្ឌដង្កោ ខណៈក្រុមសមត្ថកិច្ចចម្រុះកំពុងអនុវត្តច្បាប់ជាតិស្រវឹង។

លោកវរសេនីយ៍ទោ អ៊ូច សុខដូរ៉ា អធិការរងខណ្ឌដង្កោបានឲ្យដឹងថា៖ មុនពេលកើតហេតុមានរថយន្ត១គ្រឿង ម៉ាកព្រូស ពណ៌ប្រផេះ ពាក់ស្លាកលេខភ្នំពេញ 2CC- 8365 ចេញពីកម្មវិធីអាពាហ៍ពិពាហ៍ធ្វើដំណើរពីជើងមកត្បូងតាមបណ្តោយផ្លូវ២១៧ លុះមកចំណុចគោល ដៅត្រួតពិនិត្យជាតិស្រវឹងនៅមុខសាលាខណ្ឌដង្កោ សមត្ថកិច្ចយើងក៏សូមអញ្ជើញអ្នកបើកបរចុះសហការជាមួយសមត្ថកិច្ចពិនិត្យផ្លុំជាតិអាល់កុល ហើយនៅក្នុងរថយន្តមានមនុស្ស៤នាក់ ស្រី៣នាក់ និងអ្នកបើកបរម្នាក់។

លោកវរសេនីយ៍ទោ អ៊ួច សុខដូរ៉ា បន្តថា៖ នៅពេលសមត្ថកិច្ចផ្លុំជាតិអាលកុលទៅលើអ្នកបើកបរឃើញថាកម្រិតជាតិស្រវឹង០.៤៧ ដោយឡែកនៅពេលដែលសមត្ថកិច្ចយើងតម្រូវឲ្យគាត់បង់ផាកពិន័យ គាត់ក៏ឡាំប៉ាថតឡាយកូរនៅនឹងគោលដៅបង្កការភ្ញាក់ផ្អើលតែម្តង ហើយសមត្ថកិច្ចក៏សុំស្នើរឲ្យគាត់បិទឡាយដែលជាការហាមឃាត់ពីថ្នាក់ដឹកនាំស្នងការ។ តែបុរសរូបនេះនៅតែបន្តថតឡាយ ដែលជាការរំខានរារាំងដល់សមត្ថកិច្ចសាធារណៈ និងធ្វើឲ្យប៉ះពាល់ដល់កិត្តិយសសេចក្តីថ្លៃថ្នូររបស់កងកម្លាំង។

គួររំលឹកថា៖ នៅវេលាម៉ោង២៣យប់ថ្ងៃទី០៤ ខែមេសា ឆ្នាំ២០២៥ កម្លាំងចម្រុះបានដាក់គោលដៅត្រួតពិនិត្យអនុវត្តច្បាប់ចរាចរណ៍ផ្លូវគោក និងត្រួតពិនិត្យក្រោមឥទិ្ធពលជាតិស្រវឹង នៅលើបណ្តោយផ្លូវ២១៧ មុខសាលាខណ្ឌដង្កោ ភូមិថ្មី សង្កាត់ដង្កោ ខណ្ឌដង្កោដែលមានកម្លាំងចូលរួមចំនួន៥១នាក់ ដឹកដោយលោកឧត្តម សេនីយ៍ទោ សៀម សុវត្ថាវុធ លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ លោកវរសេនីយ៍ទោ អែល សំណាង នាយរងការិយាល័យចរាចរណ៍ក្រុង លោកវរសេនីយ៍ទោ ស៊ិន កុសល អធិការរងខណ្ឌដង្កោ និងលោកវរសេនីយ៍ទោ អ៊ូច សុខដូរ៉ា អធិការរងខណ្ឌ ដង្កោ។

ដោយឡែកលទ្ធផលត្រួតពិនិត្យមានយានយន្តឆ្លង កាត់គោលដៅចំនួន៥៥គ្រឿង និងបានឃាត់យាន យន្តល្មើសចំនួន០៥គ្រឿង(រថយន្ត០២គ្រឿង និងម៉ូតូ ០៣គ្រឿង៕