ខេត្តកំពង់ធំ៖ នាយប់ទី៣ ខែមេសា ឆ្នាំ២០២៥ ផេកផ្លូវការ លោក នួន ផារ័ត្ន អភិបាលខេត្តកំពង់ធំ បានសរសេររៀបរាប់ថា ៖ បងប្អូនបានឃើញវីដេអូនេះហើយ បាននាំគ្នាសួរខ្ញុំថា តើសម្ដេចធិបតីបានណែនាំខ្ញុំលើការងារអ្វីខ្លះ?
ជាការពិត សម្ដេច លោកពិតជាបានហៅខ្ញុំទៅណែនាំលើការងារសំខាន់ៗមួយចំនួនពិតមែន៖
១. លោកបានណែនាំឱ្យបន្តការយកចិត្តទុកដាក់លើការងារការពារធនធានធម្មជាតិ ជាពិសេសនៅតំបន់ជុំវិញបឹងទន្លេសាប និងតំបន់ព្រៃឡង់។
២. លោកបានណែនាំឱ្យបន្តប្រឹងប្រែងលើកកម្ពស់ជីវភាពបងប្អូនប្រជាពលរដ្ឋនៅក្នុងខេត្ត ហើយសម្ដេចបានមានប្រសាសន៍ថា លោកនឹងបន្តជំរុញឱ្យសួនកសិ-ឧស្សាហកម្មកែច្នៃស្វាយចន្ទី លេចចេញជារូបរាងក្នុងពេលយ៉ាងឆាប់ខាងមុខនេះ ដើម្បីជួយដល់ជីវភាពបងប្អូនប្រជាកសិករ ដែលប្រកបរបរដាំដុះដំណាំស្វាយចន្ទី។
៣. លោកបានណែនាំឱ្យបន្តតាមដានការងារ ដែលសម្ដេចបានសន្យាជាមួយបងប្អូនប្រជាពលរដ្ឋ នៅពេលដែលសម្ដេចអញ្ជើញមកកាន់ខេត្តកំពង់ធំផ្ទាល់នាពេលកន្លងមក ហើយសម្ដេចបានមានប្រសាសន៍ថា អ្វីដែលសម្ដេចបានសន្យានោះ សម្ដេចបានធ្វើជូនបងប្អូនប្រជាពលរដ្ឋ ជិត១០០ ភាគរយ ហើយ។ តាងនាមបងប្អូនប្រជាពលរដ្ឋ ខ្ញុំក៏បានគោរពថ្លែងអំណរគុណយ៉ាងជ្រាលជ្រៅ និងគោរពដឹងគុណជានិច្ចចំពោះសម្ដេច។
៤. លោកបានលើកទឹកចិត្តឱ្យបន្តការអនុវត្តនូវយុទ្ធនាការបំពាក់បង្គោលភ្លើងសូឡា នៅតាមដងផ្លូវជាតិលេខ ៦ ក្នុងភូមិសាស្ត្រខេត្តកំពង់ធំ ដើម្បីសម្រួលដល់ជីវភាពរស់នៅ និងការធ្វើដំណើររបស់បងប្អូនប្រជាពលរដ្ឋ។
៥. លោកបានណែនាំឱ្យតាមដានដំណើរការ នៃការដ្ឋានស្ថាបនាផ្លូវទាំង ៩២ គីឡូម៉ែត្រ ដែលសម្ដេចបានអនុម័ត និងដែលបានបើកការដ្ឋាននាពេលថ្មីៗនេះ ដោយ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ ជាតំណាងដ៏ខ្ពង់ខ្ពស់របស់សម្ដេចធិបតី។
ជារួម នៅគ្រប់កាលៈទេសៈទាំងអស់ សូម្បីតែនៅក្នុងខណៈពេលដែលសម្ដេចកំពុងមានទុក្ខជាទម្ងន់ ក៏សម្ដេចនៅតែមានការព្រួយបារម្ភ និងយកចិត្តទុកដាក់ចំពោះសុខទុក្ខរបស់បងប្អូនប្រជាពលរដ្ឋ ជាពិសេសលើការងារពាក់ព័ន្ធទៅនឹងជីវភាពរស់នៅផ្ទាល់របស់បងប្អូនប្រជាពលរដ្ឋតែម្តង។
