សិស្សសាលា ស្លូតបូតម្នាក់ កំព្រាឪពុកម្ដាយ រស់នៅជាមួយជីដូនចាស់ជរាគ្មានទីពឹង ត្រូវអស់សង្ខារ ដោយសារ…!
ខេត្តកែប៖ លោក សោម ពិសិដ្ឋ អភិបាលខេត្តកែប បញ្ជាក់ថា ដោយទទួលបានព័ត៌មានគ្រោះថ្នាក់ចរាចរណ៍ កាលពីរសៀលថ្ងៃទី២០ ខែមីនា ឆ្នាំ២០២៥ ដែលបណ្ដាលឲ្យបាត់បង់ជីវិត សិស្សម្នាក់ ជាយុវជនស្លូតបូត កំព្រាឪពុកម្ដាយ និងរស់នៅជាមួយជីដូនចាស់ជរាគ្មានទីពឹង ដោយមានការអាណិតអាសូរជាពន់ពេក លោក បានណែនាំដល់លោកអភិបាលក្រុងកែប និងក្រុមការងារចុះមូលដ្ឋាន ដេីម្បីចាត់ចែងរៀបចំទាំងស្រុងពិធីបុណ្យសពក្មួយប្រុស យាម ណាក់ ដែលស្ថិតនៅភូមិកែវក្រសាំង សង្កាត់កែប ក្រុងកែប ខេត្តកែប ។
ចំពោះ ករណីគ្រោះថ្នាក់ចរាចរណ៍នេះ អភិបាលខេត្តកែប ណែនាំឲ្យអ្នកបង្កហេតុត្រូវមានការទទួលខុសត្រូវ ជាមួយក្រុមគ្រួសារសព ។
លោក សោម ពិសិដ្ឋ អភិបាលខេត្តកែប សូមបងប្អូនទាំងអស់បេីកបរដោយមានការប្រុងប្រយ័ត្នខ្ពស់ ពិសេសចូលរួមគោរពច្បាប់ចរាចរណ៍ឲ្យបានខ្ជាប់ខ្ជួន ដេីម្បីសុវត្ថិភាពខ្លួនយេីង ក្រុមគ្រួសារ និងអ្នកដទៃ ៕
