Tiktok មួយបង្ហោះថា ល្បែងអនឡាញ តាមបណ្តោយផ្លូវ១០៧…! កម្លាំងប៉ុស្តិ៍នគរបាលរដ្ឋបាលបឹងព្រលឹត ចុះដល់ បញ្ជាក់ថា….!
ភ្នំពេញ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បំភ្លឺថា បន្ទាប់ពីបានឃើញគណនី TikTok មួយឈ្មោះ ten.ben44 បានធ្វើការបង្ហោះផ្សព្វផ្សាយព័ត៌មានមានទីតាំងមួយកន្លែងបើកលេងល្បែងសុីសងខុសច្បាប់យ៉ាងគគ្រឹកគគ្រេងនៅចំណុចផ្ទះលេខ២៤៨ ផ្លូវ១០៧ សង្កាត់បឹងប្រលឹត ខណ្ឌ៧មករា នោះមក។ អនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាទៅលោកអធិការ នៃអធិការដ្ឋាននគរបាលខណ្ឌ៧មករា ចុះត្រួតពិនិត្យស្រាវជ្រាវ។
លុះនៅថ្ងៃទី២១ ខែមករា ឆ្នាំ២០២៥ វេលាម៉ោ១១:១០នាទី កម្លាំងប៉ុស្តិ៍នគរបាលរដ្ឋបាលបឹងព្រលឹត បានចុះទៅដល់ទីតាំងខាងលើ ដើម្បីត្រួតពិនិត្យឃើញថាទីតាំងនោះបានបិទទ្វារចាក់សោរជាយូរថ្ងៃមកហើយ។
ការយកព័ត៌មាន ឬ រូបភាពចាស់ មកផុសឡើងវិញគឺនាំឱ្យ មហាជនមានការយល់ច្រឡំ និងមានបំណងចង់បំពុលសង្គម។ សូមបញ្ឈប់ការផ្សព្វផ្សាយព័ត៌មានមិនពិត៕
