ឪពុក និងកូនតូច២នាក់ បាត់បង់អាយុជីវិត ខណៈម្តាយរបួសធ្ងន់! ករណី បុរសម្នាក់បើកឡានទាំងស្រវឹងបុកម៉ូតូ លើផ្លូវ៦០ម៉ែត្រ!

ភ្នំពេញ៖ សមត្ថកិច្ច បញ្ជាក់ថា មាន ករណី គ្រោះថ្នាក់ចរាចរណ៍មួយកើតឡើងរវាងរថយន្តនិងម៉ូតូ បណ្ដាលឲ្យអ្នកជិះម៉ូតូឪពុកប្រពន្ធនិងកូនតូច០២នាក់សរុបមនុស្ស០៤នាក់ក្នុងនោះបណ្តាលឲ្យស្លាប់ កូនតូចប្រុស ម្នាក់ នៅកន្លែកើតហេតុ ចំណែក៣នាក់ទៀតរងរបួសធ្ងន់ត្រូវបានបញ្ជូនទៅកាន់មន្ទីរពេទ្យដើម្បីសង្រ្គោះបន្ទាន់។ លុះបញ្ជូ នទៅដល់មន្ទីរពេទ្យ ឪពុក និងកូនតូច ភេទស្រី ២នាក់ បានបាត់បង់អាយុជីវិត។ ចំណែក ម្តាយ ក៏កំពុងសង្រ្គោះបន្ទាន់។ ហេតុការណ៍នេះ ជនរងគ្រោះ ជិះម៉ូតូស្លាប់ ៣នាក់។

ហេតុការណ៍ គ្រោះថ្នាក់ចរាចរណ៍ កើតឡើង កាលពីវេលាម៉ោង ១៧ និង ៣៥នាទី ថ្ងៃទី១០ ខែ មករា ឆ្នាំ ២០២៥ ត្រង់ចំណុច លើផ្លូវ៦០ម៉ែត្រ ស្ថិតក្នុងភូមិស្រុកចេក សង្កាត់ជើងឯក ខណ្ឌដង្កោ រាជធានីភ្នំពេញ ។

១ ភាគីរថយន្តម៉ាក TOYOTA TACOMA PICK UP ពណ៌ទឹកប្រាក់ ពាក់ផ្លាកលេខ ភ្នំពេញ 2BS-1023 អ្នកបើកបរ មាន ឈ្មោះ សុខ សម្បត្តិ ភេទប្រុស អាយុ៤២ឆ្នាំ មុខរបរបើកបររថយន្ត មានទីលំនៅស្ថិតក្នុងភូមិព្រែកហូរខាងកើត សង្កាត់ព្រែកហូរ ក្រុងតាខ្មៅ ខេត្តកណ្ដាល (រងរបួសស្រាល ឃាត់ខ្លួនប្រគល់អោយទៅការិយាល័យចរាចរណ៍ផ្លូវគោករាជធានីភ្នំពេញ)។

២ ភាគីម៉ូតូម៉ាក HONDA CLICK ពណ៌ប្រផេះ ពាក់ផ្លាកលេខ ភ្នំពេញ 1II- 2330 អ្នកបើកបរពុំស្គាល់អត្តសញ្ញាណ ។
-អ្នករួមដំណើរពុំទាន់ស្គាល់អត្តសញ្ញាណ ។

ប្រភពប្រាប់ថា មុនពេលកើតហេតុរថយន្តបើកបរក្នុងទិសដៅពីជើងទៅត្បូង ចំណែកម៉ូតូបើកបរក្នុងទិសដៅពីត្បូងទៅជើង ពេលមកដល់ចំណុចកើតហេតុខាងលើ រថយន្តក៍រ៉េចង្កូតមកខាងឆ្វេងបានបុកម៉ូតូពេញមួយទំហឹងបណ្ដាលឲ្យបោកដួលតែម្ដង។

មូលហេតុ: មកពីភាគីរថយន្តបើកបរមិនប្រកាន់ចំណែកផ្លូវរបស់ខ្លួន ។សមត្ថកិច្ចត្រួតពិនិត្យជាតិស្រវឹងចំពោះអ្នកបើករថយន្តជាលទ្ធផលមាន កម្រិតអាល់កុល 0,46 Mg/l

សម្ភារ: រថយន្តនិងម៉ូតូរងការខូចខាតធ្ងន់។បច្ចុប្បន្នអ្នកបើករថយន្តត្រូវបានបញ្ជូនមកកាន់ការិយាល័យនគរបាលចរាចរណ៍ផ្លូវគោកដើម្បីយកមកសាកសួរអនុវត្តតាមនីតិវិធី៕