លោក ច្រឹង ខ្មៅ ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ សំណូមពរដល់សាធារណៈជន រួមទាំង អាចារ្យធំ គួរជៀសវាងរំលេចពាក្យពេចន៍លេីបណ្តាញសង្គម ដែលនាំឱ្យមានការយល់ច្រឡំ ការជេរប្រមាថ បុគ្គល ឬស្ថាប័ន និងនាំឱ្យមានការទទួលខុសត្រូវតាមផ្លូវច្បាប់!
ភ្នំពេញ៖ លោក លើកឡើងបែបនេះ លើគណនី ហ្វេសប៊ុកផ្លូវការផ្ទាល់ខ្លួននាព្រឹកថ្ងៃទី១០ ខែមករា ឆ្នាំ២០២៥។
ក្នុងនោះ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ បាន លើកឡើង៥ចំណុចដូចខាងក្រោម៖
(១) ជាដំបូង លោក សូមចូលរួមរំលែកទុក្ខដ៏សែនក្រៀមក្រំនេះជាមួយក្រុមគ្រួសារនៃសព លោក ដេវិឌ-ឬទ្ធិរុទ្រ (ហៅ Ruthko)។ សូមឱ្យវិញ្ញាណក្ខន្ធលោកបានសុខសប្បាយក្នុងឋានសុគតិភព។
(២ លោក សូមអរគុណដល់ម្ចាស់ផេក ហ្វេបុកអាចារ្យធំ នគររាជ ដែលបានចង្អុលនូវកំហុសរបស់អ្នកនាំពាក្យអយ្យការរាជធានីភ្នំពេញ។
(៣) និងកាន់តែល្អប្រសេីរប្រសិនបេីអាចារ្យធំបានសាកសួរមុន ដេីម្បីអ្នកនាំពាក្យធ្វេីការកែកំហុស។ វាជាកំហុសដោយអចេតនាដែលអ្នកដទៃអាចជួយកែសម្រួល រួមទាំងអាចារ្យធំផងដែរ។
(៤) កំហុសដោយអចេតនានេះ អ្នក នាំពាក្យអយ្យការភ្នំពេញបានធ្វេីការកែសម្រួលរួចហេីយ។
ទន្ទឹមនេះ លោក ច្រឹង ខ្មៅ សូមបញ្ជាក់ជូនសាធារណៈជនមេត្តាជ្រាបថា ករណី បទល្មេីសចរាចរណ៍ជាករណីអាទិភាព ដែលអយ្យការបានយកចិត្តទុកដាក់បំផុតក្នុងការចោទប្រកាន់ជនបង្កដែលមានកំហុស និងពុំអាចរួចខ្លួននៅពេលបានសងសំណងដល់ជនរងគ្រោះនោះទេ ព្រមទាំងពិនិត្យលេីសេចក្តីសម្រេចរបស់តុលាការអំពីទោសដែលផ្តន្ទាដេីម្បីអនុវត្តសិទ្ធិប្តឹងឧទ្ធណ៍ប្រសិនបេីការសម្រេចដាក់ទោសស្រាលពេក។
(៥)ជាចុងក្រោយ លោក ច្រឹង ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ សំណូមពរដល់សាធារណៈជន រួមទាំងអាចារ្យធំ គួរជៀសវាងរំលេចពាក្យពេចន៍លេីបណ្តាញសង្គមដែលនាំឱ្យមានការយល់ច្រឡំ ដែលនាំឱ្យមានការជេរប្រមាថបុគ្គលឬស្ថាប័ន និងដែលអាចនាំឱ្យមានការទទួលខុសត្រូវតាមផ្លូវច្បាប់។
