បាត់ដំបង៖ ស្ត្រីម្នាក់ ឈ្មោះ ផៃ ទូច អាយុ៣៨ឆ្នាំ ត្រូវបាន ឃាតករ ជាប្តី យកដំបងឫស្សីវាយនិងជាន់ក បណ្តាលអោយស្លាប់ យ៉ាងអាណោចអាធ័ម។
ហេតុការណ៍នេះបង្កអោយមានការភ្ញាក់ផ្អើលដល់អាជ្ញាធរ និង សមត្ថកិច្ច ស្រុកបាណន់ កាលពីព្រឹកថ្ងៃទី១៧ ខែធ្នូ ឆ្នាំ ២០២៤ ចំណុចវាលស្រែ ក្បែរស្រះទឹកមួយកន្លែង ស្ថិតក្នុងភូមិតាគ្រាម ឃុំតាគ្រាម ស្រុកបាណន់ ខេត្តបាត់ដំបង។
ប្រភពព័ត៌មានបានអោយដឹងថា៖ជនសង្ស័យ ជាប្តី ឈ្មោះ ផល ភារម្យ ភេទប្រុស អាយុ៤១ឆ្នាំ (ជាប្តីចុង)រស់នៅក្នុងភូមិ ឃុំកើតហេតុ ខាងលើ ជាមនុស្សញៀនស្រា និងរករឿងឈ្លោះជាមួយប្រពន្ធរៀងរាល់ថ្ងៃ។
បន្ទាប់មកជនសង្ស័យត្រូវបានកម្លាំងនគរបាលស្រុកបាណន់ សហការ ជាមួយកម្លាំងប៉ុស្តិ៍នគរបាលរដ្ឋបាល តាគ្រាម ឃាត់ខ្លួន និង បញ្ជូនទៅ ស្នងការដ្ឋាននគរបាលខេត្តបាត់ដំបង ដើម្បីចាត់ការបន្តទៅតាមនិតិវិធី។
ចំណែក សពស្ត្រីរងគ្រោះ ត្រូវបាន អាជ្ញាធរមូលដ្ឋាន និង ប្រជាពលរដ្ឋ រៃលុយគ្នា រៀបចំធ្វើបុណ្យតាមប្រពៃណី៕
ដោយ ៖ សុខ កុសល
