បាត់ដំបង៖ ម៉ូតូកង់បីឥណ្ឌាបើកបរជ្រុលចង្កូត បុករថយន្ត១គ្រឿងពីក្រោយ កំពុងចតនៅស្ងៀម ខាងមុខរោងការ បណ្តាលអោយរងរបួលធ្ងន់ស្រាលចំនួន៥នាក់។
ហេតុការណ៍នេះបានកើតឡើងកាលពីវេលាម៉ោង១និង៤០នាទី រសៀល ថ្ងៃទី១២ ខែធ្នូ ឆ្នាំ២០២៤ នៅតាមបណ្តោយដងផ្លូវ ១ខ្សែ ខាងត្បូងសាលាបឋមសិក្សារ អូរតាគាំ១ ស្ថិតនៅក្នុងភូមិអូរតាគាំ១ សង្កាត់ទួលតាឯក ក្រុងបាត់ដំបង ខេត្តបាត់ដំបង។
ក្រោយពេលកើតហេតុភ្លាមៗនោះប្រជាពលរដ្ឋបានដឹកជនរងគ្រោះទាំង៥នាក់ ក្នុងនោះរួមមានតៃកុងបើកបរ ភេទប្រុស មិនស្គាល់អត្តសញ្ញាណនិងជនរងគ្រោះ៤នាក់ទៀត មិនស្គាល់អត្តសញ្ញាណដូចគ្នា បញ្ជូនទៅសង្រ្គោះបន្ទាន់ នៅមន្ទីរពេទ្យស្នងការ នគរបាល ខេត្តបាត់ដំបង។
បន្ទាប់មក កម្លាំងនគរបាលចរាចរណ៍ផ្លូវគោក នៃស្នងការដ្ឋាន នគរបាលខេត្តបាត់ដំបង បានចុះទៅដល់ទីតាំងកើតហេតុ ដើម្បីធ្វើការវាស់វែង និងស្រាវជ្រាវរកមូលហេតុដែលបង្កអោយមានគ្រោះចរាចរណ៍កើតឡើងជាយថាហេតុ។
បច្ចុប្បន្នកម្លាំងនគរបាលចរាចរណ៍បានស្ទួច យកម៉ូតូកង់បីឥណ្ឌា (Pass App) ទៅរក្សារទុកបណ្តោះអាសន្ននៅការិយាល័យចរាចរណ៍ផ្លូវគោកខេត្តបាត់ដំបង និង អញ្ជើញតៃកុងបើកបរ រថយន្តកូរ៉េ ដែលចតនៅស្ងៀមយកទៅសាកសួរដើម្បី រៀបចំសំនុំរឿងដោះស្រាយដោយសន្តិវិធី៕ដោយ សុខ កុសល
