គម្រោងសាងសង់ ក្លឹបប្រដាល់គុនខ្មែរ នៅស្រុកស្ទឹងត្រង់នេះ នឹងប្រើប្រាស់កញ្ចប់ថវិកាមូលនិធិ «យើងរួមគ្នាលើកស្ទួយ ជួយគុនខ្មែរ»

អនុវត្តតាមអនុសាសន៍ដ៏ខ្ពង់ខ្ពស់របស់សម្ដេចតេជោ នៅព្រឹកថ្ងៃពុធ ទី២០ ខែវិច្ឆិកា ឆ្នាំ ២០២៤ ឯកឧត្តម ខូវ ឆាយ ប្រធានសហព័ន្ធកីឡាប្រដាល់គុនខ្មែរ ក្រោមកិច្ចគាំទ្រពីអាជ្ញាធរមូលដ្ឋាននៃស្រុកស្ទឹងត្រង់ មន្ទីអប់រំ យុវជន និងកីឡាខេត្តកំពង់ចាម ការិយាល័យអប់រំ យុវជន និងកីឡាស្រុកស្ទឹងត្រង់ ព្រមទាំងលោកនាយកសាលា សម្ដេចតេជោ ហ៊ុន សែន ស្ទឹងត្រង់ បានចុះសិក្សា និងពិនិត្យមើលទីតាំងផ្ទាល់ ដើម្បីរៀបចំសាងសង់ និងបង្កើតក្លឹបកីឡាប្រដាល់គុនខ្មែរ នៅក្នុងបរិវេណវិទ្យាល័យ សម្ដេចតេជោ ហ៊ុន សែន ស្ទឹងត្រង់ ស្ថិតនៅឃុំព្រែកកក់ ស្រុកស្ទឹងត្រង់ ខេត្តកំពង់ចាម។

ជាមួយគ្នានេះដែរ សហព័ន្ធនឹងចាត់បញ្ជូនគ្រូបង្វឹកឆ្នើមដែលមានបទពិសោធន៍ ដើម្បីទៅដឹកនាំការហ្វឹកហាត់ដល់យុវជន យុវនារី សិស្សានុសិស្ស នៅមូលដ្ឋានស្រុកស្ទឹងត្រង់ ដែលមានទេពកោសល្យ និងចំណង់ចំណូលចិត្តលើវិស័យកីឡាគុនខ្មែរ អាចចូលរួមហ្វឹកហាត់ក្រៅម៉ោងសិក្សា។

ចំពោះ គម្រោងសាងសង់ក្លឹបប្រដាល់គុនខ្មែរ នៅមូលដ្ឋាន ស្រុកស្ទឹងត្រង់នេះ នឹងប្រើប្រាស់កញ្ចប់ថវិកាមូលនិធិ «យើងរួមគ្នាលើកស្ទួយ ជួយគុនខ្មែរ » ដែលទទួលបានពីការបរិច្ចាករបស់សប្បុរជននានាកន្លងមក។