លោក ចេង មុនីរ៉ា ៖ បញ្ហាជំនន់ទឹកភ្លៀង ករណី សង្កាត់មិនមានលទ្ធភាពឬដោះស្រាយមិនបាន ត្រូវរាយការណ៍សាលាខណ្ឌបន្ទាន់ ដើម្បីយើងអាចជួយពួកគាត់បានទាន់ពេលវេលា!

ភ្នំពេញ៖ លោក ចេង មុនីរ៉ា អភិបាល នៃគណៈអភិបាលខណ្ឌច្បារអំពៅ នៅថ្ងៃទី៩ ខែតុលាឆ្នាំ២០២៤ បានដឹកនាំកិច្ចប្រជុំគណៈ បញ្ជាការឯកភាពរដ្ឋបាលខណ្ឌដោយមានការអញ្ជើញចូលរួមពីសំណាក់ លោក-លោកស្រី ជាអភិបាលរងខណ្ឌ លោកអធិការនគរបាលខណ្ឌ លោកមេបញ្ជាការកងរាជអាវុធខណ្ឌ លោក-លោកស្រី លោកប្រធានការិយាល័យ លោក​ ​-លោកស្រីចៅសង្កាត់​  លោកមេប៉ុស្តិ៍  និង ស្មៀនសង្កាត់ទាំង៨។

នៅក្នុងកិច្ចប្រជុំ លោកអភិបាលខណ្ឌបានដាក់ចេញនូវិធានការដែលត្រូវអនុវត្ត៖

១. ពង្រឹងនូវការអនុវត្តគោលនយោបាយភូមិសង្កាត់ មានសុវត្ថិភាពឱ្យកាន់តែមានប្រសិទ្ធភាព ជាពិសេសលើការងារផ្តល់សេវាសាធារណៈ ធ្វើឱ្យបាន ធ្វើឱ្យលឿន និងមានតម្លាភាព និង វិធានការបង្ការទប់ស្កាត់ ៖ ល្បែងស៉ីសងគ្រប់ប្រភេទ. សកម្មក្មេងទំនើង.  គ្រឿងញៀន ។ល។

២. សង្កាត់នីមួយៗត្រូវពង្រឹងវេនយាមប្រចាំការនិងដឹកនាំកម្លាំងល្បាតក្នុងមូលដ្ឋានដើម្បីងាយស្រួល និងដោះស្រាយបានទាន់ពេលវេលានូវហេតុការណ៍ផ្សេងៗដែលអាចកើតមានឡើងជាយថាហេតុជាពិសេសនៅពេលយប់។

៣. សង្កាត់នីមួយៗត្រូវត្រៀមដោះស្រាយនូវការលិចលង់ដោយទឹកភ្លៀង។ ករណីសង្កាត់មិនមានលទ្ធភាពឬដោះស្រាយមិនបាន ត្រូវរាយការណ៍សាលាខណ្ឌបន្ទាន់ ដើម្បីយើងអាចជួយពួកគាត់បានទាន់ពេលវេលា។

៤. លោកអភិបាលរងទទួលបន្ទុក ត្រូវបន្តដឹកនាំការរៀបចំសណ្តាប់ធ្នាប់សាធារណៈ និងដឹកនាំការងារដោះស្រាយការកកស្ទះចរាចរណ៍ក្នុងមូលដ្ឋាន។

៥. លោក លោកស្រីអភិបាលរងទទួលបន្ទុក ត្រូវពង្រឹងការងារគ្រប់គ្រងជនបរទេសក្នុងដែនសមត្ថកិច្ច។

ដោយឡែក នារសៀលថ្ងៃទី៩ ខែតុលា ឆ្នាំ២០២៤ វេលាម៉ោង ១៥និង០០នាទី លោក ចេង មុនីរ៉ា អភិបាលខណ្ឌច្បារអំពៅ បានជួបសំណេះសំណាលជាមួយកម្លាំងសណ្តាប់ធ្នាប់ខណ្ឌដើម្បីពង្រឹងការអនុវត្តភារកិច្ចក្នុងដែនសមត្ថកិច្ច និងបានឧបត្ថម្ភនូវអង្ករនិងថវិកាមួយចំនួន។