បាញ់ និងគប់គ្រាប់បែក នៅចំណុច កាស៊ីណូ ថ្មពេជ្រ ប៉ូលិស តាមប្រមាញ់ឈានដល់ការឃាត់ជនសង្ស័យ៣នាក់
ខេត្តកណ្តាល៖ សមត្ថកិច្ច បញ្ជាក់ថា កាលពីថ្ងៃទី២៦ ខែកញ្ញា ឆ្នាំ២០២៤ វេលាម៉ោង១២ និង ៤៤នាទី នៅចំណុចកាស៊ីណូថ្មពេជ្រ ស្ថិតនៅ ភូមិក្អមសំណរក្រោម ឃុំក្អមសំណរ ស្រុកលើកដែក ខេត្តកណ្ដាល មានករណីផ្ទុះអាវុធ (កែច្នៃ) បណ្តាលឲ្យជនរងគ្រោះឈ្មោះ ចៅ រិន ភេទប្រុស អាយុ៥២ឆ្នាំ ជនជាតិខ្មែរ មុខរបរសន្តិសុខ មានទីលំនៅភូមិក្អមសំណរក្រោម ឃុំក្អមសំណរ ស្រុកលើកដែក ខេត្តកណ្ដាល (រងរបួសឆ្អាដៃ ខាងឆ្វេងបន្តិច)។
ដោយអនុវត្តតាមបទបញ្ជារបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ កម្លាំងនាយកដ្ឋាននគរបាលព្រហ្មទណ្ឌ បានដឹកនាំសហការស្រាវជ្រាវភ្លាមៗ។
បន្ទាប់ពីធ្វេីការស្រាវជ្រាវរហូតឈានដល់កំណត់មុខសញ្ញា នៅថ្ងៃទី២៨ ខែកញ្ញា ឆ្នាំ២០២៤ កម្លាំងជំនាញនាយកដ្ឋាន ដឹកនាំដោយលោកឧត្តមសេនីយ៍ត្រី ខេង ម៉េងឈាង អនុប្រធាននាយកដ្ឋាន បានដឹកនាំកម្លាំងជំនាញស្នងការដ្ឋាននគរបាលខេត្តកណ្តាល និងស្នងការដ្ឋាននគរបាលខេត្តព្រៃវែង ធ្វើការបង្រ្កាប និងឃាត់ខ្លួនជនសង្ស័យចំនួន០៣នាក់ រួមមាន៖
ទី១៖ ឈ្មោះ មាស អូន ភេទប្រុស អាយុ៥០ឆ្នាំ ជនជាតិខ្មែរ ស្នាក់នៅភូមិ១ ឃុំព្រែកខ្សាយ ក ស្រុកពាមរក៍ ខេត្តព្រៃវែង
ទី២៖ ឈ្មោះ ង្វៀវ ចុងង្វៀវ ភេទប្រុស អាយុ៤៤ឆ្នាំ ជនជាតិវៀតណាម ស្នាក់នៅភូមិ១ ឃុំព្រែកខ្សាយក ស្រុកពាមរក៍ ខេត្តព្រៃវែង
ទី៣៖ ឈ្មោះ ង្វៀវ ឌី ភេទប្រុស អាយុ៣៨ឆ្នាំ ជនជាតិវៀតណាម ស្នាក់នៅភូមិ១ ឃុំព្រែកខ្សាយ ក ស្រុកពាមរក៍ ខេត្តព្រៃវែង។
បច្ចុប្បន្នជនសង្ស័យខាងលើ បាននាំមកកាន់នាយកដ្ឋាន ដេីម្បីប្រគល់ជូនស្នងការដ្ឋាននគរបាលខេត្តកណ្តាល ចាត់ការបន្តតាមនីតិវិធី៕
