បាត់ដំបង៖កម្លាំងនគរបាលនៃការិយាល័យ ប្រឆាំងបទល្មើសគ្រឿងញៀន ស្នងការនគរបាលខេត្តបាត់ដំបង សហការជាមួយកម្លាំងនគរបាលក្រុងបាត់ដំបង បានចុះធ្វើការបង្ក្រាបករណីជួញដូរថ្នាំញៀន ១ករណី និងឃាត់ខ្លួនជនសង្ស័យម្នាក់ ក្នុងបទល្មើសជាក់ស្ដែង។
កិច្ចប្រតិបត្តិការនេះបានធ្វើឡើងកាលពីវេលាម៉ោង ២៣ និង ០០នាទីយប់ ថ្ងៃទី៧ ខែសីហា ឆ្នាំ២០២៤ នៅចំណុចភូមិអូរតាគាំ១ សង្កាត់ទួលតាឯក ក្រុងបាត់ដំបង។
ប្រភពព័ត៌មានបានអោយដឹងថា៖ជនសង្ស័យឈ្មោះ ឈួម សុខវណ្ណី ហៅ ឃ្លោក ភេទប្រុស អាយុ ៣៧ ឆ្នាំ មានទីលំនៅក្នុងភូមិកគោ ឃុំជ្រៃ ស្រុកថ្មគោល ខេត្តបាត់ដំបង ។
បន្ទាប់ពីឃាត់ខ្លួនជនសង្ស័យខាងលើ សមត្ថកិច្ចជំនាញដកហូតវត្ថុតាងរួមមាន៖ថ្នាំញៀនគ្រាប់រាងមូលសំប៉ែតពណ៌ផ្កាឈូកចំនួន ១៩៧៦ គ្រាប់ កាំភ្លើងម៉ាក ROLO ១ដើម មានគ្រាប់ចំនួន២៥គ្រាប់សំបកគ្រាប់ចំនួន៦ ទូរស័ព្ទដៃចំនួន ៣គ្រឿង រថយន្តម៉ាកកូរ៉ូឡាពណ៌ស្លែបិទ ស្គុតស ពាក់ស្លាកលេខ ភ្នំពេញ 2G-7741 ចំនួន១គ្រឿង និងសម្ភារៈប្រើប្រាស់ថ្នាំញៀនមួយចំនួនទៀត ។
បច្ចុប្បន្ន ជនសង្ស័យរួមទាំងវត្ថុតាងត្រូវបានកម្លាំងជំនាញអធិការនគរបាលក្រុង បាត់ដំបង ធ្វើការសាកសួរដើម្បីរៀបចំសុំណុំរឿងបញ្ជូនទៅសាលាដំបូងខេត្តបាត់ដំបង ចាត់ការបន្តទៅតាមនិតិវិធី៕ ដោយ ៖ សុខ កុសល
