ការលែងគោ ដើរស៊ីពាសវាលពាសកាល បែបនេះ បើបង្កគ្រោះថ្នាក់ចរាចរណ៍ ម្ចាស់ត្រូវទទួលខុសត្រូវផ្នែករដ្ឋប្បវេណី!
រដ្ឋបាលស្រុកខ្សាច់កណ្តាល ៖ សូមជម្រាបជូនដល់បងប្អូនប្រជាពលរដ្ឋ ដែលចិញ្ចឹមសត្វ ពាហនៈ (គោ ក្របី ពពែ…) សូមមើលថែរ ចិញ្ជឹមដោយទទួលខុសត្រូវ មិនត្រូវព្រលែងសត្វដើរពាសវាលពាសកាលតាមដងផ្លូវសាធារណៈ ទីប្រជុំជន ទីស្រែ ចំការ ឡើយ ដើម្បីចូលរួមចំណែកក្នុងការកាត់បន្ថយគ្រោះថ្នាក់ចរាចរលើផ្លូវសាធារណៈជាយថាហេតុ និងចូលរួមថែរក្សា សណ្តាប់ធ្នាប់ របៀបរៀបរយលើកកម្ពស់អនាម័យបរិស្ថាន សោភ័ណភាពតាមដងផ្លូវ តាមទីប្រជុំជន និងតាមទីសាធារណៈក្នុងមូលដ្ឋានបានល្អប្រសើរផង ៕
សូមអរគុណទុកជាមុន ចំពោះការចូលរួម!
ច្បាប់ស្តីពីចរាចរណ៍ផ្លូវគោក មាត្រា ៨៦ ករណីលែងសត្វចិញ្ចឹមឲ្យដើររហេតរហូតលើផ្លូវថ្នល់ ជនលែងសត្វដែលខ្លួនចិញ្ចឹម អោយដើររហេតរហូតលើផ្លូវថ្នល់បណ្តាលអោយមានគ្រោះថ្នាក់ចរាចរណ៍ ត្រូវទទួលខុសត្រូវផ្នែករដ្ឋប្បវេណី។
យោងតាមមាត្រា ២០៧ នៃក្រមព្រហ្មទណ្ឌ ចែងថា ការធ្វេសប្រហែស ការមិនប្រុងប្រយ័ត្ន ឬការខ្ជីខ្ជា បណ្តាលឱ្យស្លាប់អ្នកដទៃ ជាបទល្មើសមនុស្យឃាតដោយអចេតនាដែលត្រូវផ្តន្ទាទោសដាក់ពន្ធនាគារពី ១ ឆ្នាំទៅ ៣ ឆ្នាំ និងពិន័យជាប្រាក់ពី ២ លានរៀលទៅ ៦ លានរៀល។ ដោយឡែកសំណងព្យសនកម្មលើជនរងគ្រោះ ជាការទទួលខុសត្រូវរបស់ជនល្មើស។ មាត្រា ៧៥០ នៃក្រមរដ្ឋប្បវេណី ឆ្នាំ ២០០៧ ចែងថា បុគ្គលដែលកាន់កាប់សត្វ ត្រូវទទួលខុសត្រូវក្នុងការសងការខូចខាតដែលកើតឡើងដល់អ្នកដទៃដោយសត្វដែលខ្លួនបានកាន់កាប់។
