ស្ត្រីជាម្តាយស្រែកទ្រហោយំទាមទារកយុត្តិធម៌ នៅស្រុកបាទី នគរបាលប៉ុស្តិ៍ពត់សរ និង អធិការស្រុក ជួយ បកស្រាយផង! ស្នងការ បំភ្លឺ ដូចខាងក្រោម៖
ខេត្តតាកែវ៖ អ្នកនាំពាក្យស្នងការដ្ឋាននគរបាលខេត្តតាកែវ សូមជម្រាបជូនអ្នកតាមដានព័ត៌មានសង្គម និងសារធារណៈជនអំពីការចុះផ្សាយ វីដេអូររបស់ គណនីហ្វេសប៊ុកឈ្មោះ krouch vanna គ្រួច វណ្ណា មនចំណងជើងថា តាកែវទៀតហើយ! ស្ត្រីជាម្តាយស្រែកទ្រហោយំទាមទារកយុត្តិធម៌ នៅស្រុកបាទី នគរបាលប៉ុស្តិ៍ពត់សរ និង អធិការស្រុក ជួយ បកស្រាយផង។
សូមជម្រាបជូនថាៈ ករណីគ្រោះថ្នាក់ចរចរណ៍ខាងលើ កើតឡើងកាលពីថ្ងៃទី១០ ខែធ្នូ ឆ្នាំ២០២៣ វេលាម៉ោង១៨ និង ២០នាទី នៅលេីផ្លូវបេតុង ស្ថិតក្នុងភូមិក្រាំងពោធិ៍ ឃុំពត់សរ ស្រុកបាទី ខេត្តតាកែវ រវាងម៉ូតូ និងអ្នកថ្មេីរជេីង ( បណ្តាលឱ្យកុមារីម្នាក់ស្លាប់ភ្លាមៗពេលកើតហេតុ)។
-កុមារីដែលរងគ្រោះបាត់បង់អាយុជីវិតមានឈ្មោះ ឃឹម សៀវឈីញ អាយុ២ឆ្នាំ រស់នៅភូមិ ឃុំកើតហេតុ។
-ម៉ូតូម៉ាក XR ពណ៍ក្រហម មិនស្គាល់ផ្លាកលេខ មិនស្គាល់អត្តសញ្ញាណ ដោយបានបេីកម៉ូតូគេចខ្លួនបាត់។
ក្រោយពេលកេីតហេតុកម្លាំងជំនាញអធិការដ្ឋាននគរបាលស្រុកបាទី សហការជាមួយកម្លាំងប៉ុស្តិ៍នគរបាលរដ្ឋបាលពត់សរ បានធ្វេីការស្រាវជ្រាវស្វែងរកអត្តសញ្ញាណអ្នកបើកបរ។
បន្ទាប់ពីធ្វើការស្រាវជ្រាវ កម្លាំងជំនាញ បានរកឃើញថា អ្នកបើកបរមានឈ្មោះ សារឿន ធារ៉ា ភេទប្រុស អាយុ១៧ឆ្នាំ សិស្ស មានទីលំនៅភូមិខ្វាន់មាស ឃុំពត់សរ ស្រុកបាទី(រត់គេចខ្លួន)។
ករណីនេះ សមត្ថកិច្ចជំនាញបានអញ្ជេីញតំណាងក្រុមគ្រួសាររងគ្រោះមកបំពេញនីតិវិធី ហើយក្នុងអំឡុងពេលកសាងសំណុំរឿង ភាគីទាំងពីរក៏បានចូលមកធ្វេីការសម្របសម្រួលចំនួន០២លេីកនៅចំពោះមុខសមត្ថកិច្ចជំនាញ ប៉ុន្តែភាគីទាំងពីរមិនត្រូវរូវគ្នាទេ ដោយភាគីរងគ្រោះបានសំណូមពរចាត់ការតាមច្បាប់។
បច្ចុប្បន្ន កម្លាំងជំនាញនគរបាលស្រុកបាទី បានកសាងសំណុំរឿងបញ្ជូនមកការិយាល័យចរាចរណ៍គោក នៃស្នងការដ្ឋាននគរបាលខេត្តតាកែវ នឹងកំពុងបន្តនីតិវិធីបញ្ជូនទៅសាលាដំបូងខេត្ត។ យើងសូមចូលរួមសោកស្តាយដល់គ្រួសាររងគ្រោះចំពោះការបាត់បង់នេះ ប៉ុន្តែការចោទប្រកាន់ថាសមត្ថកិច្ចមិនចាត់ការរកយុត្តិធម៌ជូនគឺមិនត្រឹមត្រូវនោះទេ ព្រោះករណីនេះក៏មន្ត្រីជំនាញបានស្រាវជ្រាវរកភាគីអ្នកបើកបរ នឹងកំពុងតែកសាងសំណុំរឿងដើម្បីបញ្ជូនទៅសាលាដំបូងខេត្តដើម្បីបន្តនីតិវិធីផងដែរ ។
អាស្រ័យហេតុនេះ សូមសាធារណៈជន និងអ្នកតាមដានព័ត៌មានសង្គម ជាពិសេសម្ចាស់គណនីខាងលើយល់ ជៀសវាងការយល់ច្រលំមកលើចំណាត់ការនគរបាល។
