ខែភ្លៀង សូមប្រុងប្រយ័ត្នខ្ពស់! ភ្លៀងមួយមេ នៅស្រុកលំផាត់ រន្ទះបា_ញ់ បុរសម្នាក់ស្លា_ប់ភ្លាមៗ
ខេត្តរតនគិរី ៖ ភ្លៀងធ្លាក់មួយមេលាយឡំខ្យល់ និងផ្គររន្ទះផងនោះបុរសម្នាក់បានចាកចេញពីចម្ការធ្វើដំណើរផ្ទះវិញ ជាអកុសលតាមផ្លូវត្រូវបានរន្ទះបាញ់ស្លាប់ចោលប្រពន្ធនិងកូនយ៉ាងសង្វេគ។
ហេតុការណ៍នេះ បានកើតឡើងកាលវេលាម៉ោង២និង២០នាទីរសៀល ថ្ងៃទី២០ ខែឧសភា ឆ្នាំ២០២៣ ត្រង់ចំណុចភូមិដីឡូត៍ ឃុំជ័យឧត្តម ស្រុកលំផាត់។
លោក ក្លល់ ថើង អធិការនគរបាលស្រុកលំផាត់ បានអោយដឹងថា ជនរងគ្រោះមានឈ្មោះ ព្រំ ឃ្នី ភេទប្រុស អាយុ៤១ឆ្នាំ ជនជាតិខ្មែរ មុខរបរកសិករ មានទីលំនៅបច្ចុប្បន្នភូមិដីឡូត៍ ឃុំជ័យឧត្តម ស្រុកលំផាត់ ខេត្តរតនគិរី។ មុនកើតហេតុវេលាម៉ោង២និង០០នាទី ជនរងគ្រោះបានទៅវាស់ដីនៅចម្ការឈ្មោះហាក់ ពេលទៅដល់ក៏មានភ្លៀងខ្យល់ ហើយវាស់ដីមិនកើតក៏បានជិះម៉ូតូរបស់ខ្លួន ម្នាក់ឯងវិលត្រឡប់មកផ្ទះវិញ ពេលមកដល់ចំណុចចម្ការឈ្មោះយាយចិន ស្ថិតក្នុងភូមិដីឡូត៍ ឃុំជ័យឧត្តម ក៏មានរន្ទះបាញ់ត្រូវជនរងគ្រោះដែលកំពុងជិះម៉ូតូ បណ្តាលឲ្យដួលទៅដីស្លាប់នៅនឹងកន្លែងកើតហេតុភ្លាមៗ។
សូមបញ្ជាក់ផងដែរថា នៅក្នុងឆ្នាំនេះគ្រោះធម្មជាតិសាហាវខ្លាំងណាស់ សូមបងប្អូនប្រជាពលរដ្ឋដែលធ្វើដំណើរនៅលើដងផ្លូវមេត្តាមានការប្រុងប្រយ័ត្នកុំប្រើប្រាស់ទូរសព្ទដៃ កំពុងតែមេឃភ្លៀង និងប្រើប្រាស់អ៊ីនធឺណិត ជាហេតុធ្វើឲ្យមានគ្រោះថ្នាក់ដល់អាយុជីវិត៕
ប្រភព ៖ ផេក ទូរទស្សន៍ ខេត្តរតនគិរី
