ល្បែងឆ្នោតកន្ទុយលេខវៀតណាម កំពុងពេញនិយមលេង នៅសង្កាត់ដើមមៀន និងសង្កាត់តាខ្មៅ សង្ស័យមានបារមីខ្ពស់ទើប សមត្ថកិច្ច មិន បង្ក្រាប ឬ ទប់ស្កាត់សោះ…ពេលនេះ…!
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល មានកិត្តិយសសូមបំភ្លឺជូនសាធារណជនទៅនឹងម្ចាស់គេហទំព័រ «ពេញចិត្ត» ដែលបានចុះផ្សាយថា: ល្បែងឆ្នោតកន្ទុយលេខវៀតណាមកំពុងពេញនិយមលេង នៅសង្កាត់ដេីមមៀន និងសង្កាត់តាខ្មៅ ក្រុងតាខ្មៅ ខេត្តកណ្តាល សង្ស័យមានបារមីខ្ពស់ទេីបសមត្ថិកិច្ចមិនធ្វេីការបង្រ្គាប ឬទប់ស្កាត់សោះ ។
ក្រោយពីទទួលបានព័ត៌មានភ្លាម លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាឲ្យលោកអធិការនគរបាលក្រុងតាខ្មៅ ស្រាវជ្រាវទីតាំងខាងលើជាបន្ទាន់។
ជាលទ្ធផល៖
នៅរសៀលថ្ងៃព្រហស្បតិ៍ ១៤រោច ខែពិសាខ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៨ ខែឧសភា ឆ្នាំ២០២៣ លោកអធិការបានបញ្ជាកម្លាំងផ្នែកជំនាញ សហការជាមួយកម្លាំងប៉ុស្តិ៍នគរបាលរដ្ឋបាលទាំងពីរសង្កាត់ ចុះពិនិត្យដល់ទីតាំងរួមមាន៖
-ទីតាំងទី១ ៖ ស្ថិតនៅភូមិដេីមមៀន សង្កាត់ដេីមមៀន ក្រុងតាខ្មៅ ដែលមានម្ចាស់ទីតាំងឈ្មោះ គាង វាសនា ភេទស្រី អាយុ ៣៣ឆ្នាំ មុខរបរ កត់ឆ្នោតវៀតណាមខុសច្បាប់ បានធ្វើកិច្ចសន្យាបិទទីតាំងតែម្តង។
-ទីតាំងទី២៖ ស្ថិតនៅភូមិតាខ្មៅ១ សង្កាត់តាខ្មៅ ក្រុងតាខ្មៅ ដែលមានម្ចាស់ទីតាំងឈ្មោះ អ៉ឹង ហ៊ុយគង់ ភេទស្រី អាយុ ៤៩ឆ្នាំ មុខរបរ លក់ហ្គាស់ វេរលុយ និង កត់ឆ្នោតខ្មែរ ដែល
មានច្បាប់ត្រឹមត្រូវ ចំពោះទីតាំងនេះសមត្ថកិច្ចក៏បានធ្វើកិច្ចសន្យាបន្ថែមផងដែរមិនឲ្យមានកត់ឆ្នោតវៀតណាមខុសច្បាប់ឡើយ។
អាស្រ័យហេតុនេះសូមសាធារណជន និងបណ្តាញសារព័ត៌មានជ្រាប៕
