បុរសម្នាក់ បាត់បង់អាយុជីវិត ក្នុងឧបទ្ទវហេតុ ភ្លៀងលាយឡំដោយ ខ្យល់កន្រ្តាក់ ក្នុងក្រុងសៀមរាប

ខេត្តសៀមរាប ៖ យោងតាមផេកផ្លូវការ ឯកឧត្តម ទៀ សីហា អភិបាលខេត្តសៀមរាប បានបង្ហោះ នាយប់ទី២៩ មីនា ២០២៣ ថា ៖ ខ្ញុំសូមចូលរួមសោកស្តាយ ជាមួយបងប្អូនប្រជាពលរដ្ឋចំពោះ ការខូចខាត និងរំលែកទុក្ខ ជាមួយក្រុមគ្រួសារសព បងប្រុស ផេង ចន្ធូ អាយុ៤៤ឆ្នាំ ដែលបានទទួលមរណភាព ក្នុងគ្រោះ ឧបទ្ទវហេតុ ភ្លៀងលាយខ្យល់កន្រ្តាក់ ក្នុងក្រុងសៀមរាប។

សូមជម្រាបថា កាលពីវេលាម៉ោង១៧ និង២០នាទី ថ្ងៃទី២៩ ខែមីនា ឆ្នាំ២០២៣ ក្នុងភូមិសាស្ត្រខេត្តសៀមរាប មានភ្លៀង ផ្គររន្ទះ និងខ្យល់កន្ត្រាក់ ឧបទ្ទវហេតុនេះ បានបណ្តាលឱ្យដួលបាក់របាកាត់ទទឹងថ្នល់ ការតុបតែងមួយចំនួន ក្នុងក្រុងសៀមរាប។
ភ្លាមៗ នេះដែរ គណៈបញ្ជាការឯកភាពខេត្ត និងគណៈកម្មការគ្រប់គ្រងគ្រោះមហន្តរាយខេត្ត បានចាត់កម្លាំងចុះកាត់ រុះរើជាបន្ទាន់ ដើម្បីបញ្ចៀសការកកស្ទះចរាចរ និងឧបទ្ទវហេតុផ្សេងៗ បានរួចរាល់ហើយ នៅវេលាម៉ោង១៩ និង២០នាទី ថ្ងៃទី២៣ ខែមីនា ឆ្នាំ២០២៣។

រដ្ឋបាលខេត្ត សូមសំដែងការសោកស្តាយចំពោះឧបទ្ទវហេតុ នៃគ្រោះធម្មជាតិនេះ និងសូមថ្លែងអំណរគុណដល់កម្លាំងសមត្ថកិច្ច យុវជន និងប្រជាពលរដ្ឋ ដែលបានចូលរួមរុះរើ។