ខេត្តស្ទឹងត្រែង៖ កម្លាំងនគរបាល នៃមន្ទីរប្រឆាំងគ្រឿងញៀន កម្លាំង BLO កម្លាំងនគរបាលប្រចាំច្រកទ្វារអន្តរជាតិត្រពាំងគ្រៀល សហការជាមួយនឹងកម្លាំងនគរបាលគ្រឿងញៀន នៃស្នងការនគរបាលខេត្តស្ទឹងត្រែង បានឃាត់ខ្លួនជនជាតិឡាវចំនួន២នាក់ត្រូវ និងដកហូត វត្ថុតាងគ្រឿងញៀនចំនួន ១៣កញ្ចប់ធំ កាលពីវេលាម៉ោង៧និង០៥នាទីថ្ងៃទី២៧ មីនា ២០២៣ ស្ថិតនៅចំណុចស្ពានទី២ភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ។
បើតាមប្រភពពីសមត្ថកិច្ចបានឲ្យដឹងថា ប្រតិបត្តិការខាងលើនេះបានឃាត់ខ្លួនជនសង្ស័យ ជនសង្ស័យជនជាតិឡាវចំនួន ២នាក់។ សមត្ថកិច្ចបានឲ្យដឹងថាដោយ មានការសង្ស័យកម្លាំងនគរបាលប្រចាំច្រកទ្វារអន្តរជាតិត្រពាំងគ្រៀលក៏ បានឃាត់សាកសួរត្រួតពិនិត្យលិខិតឆ្លងដែននិងរថយន្តដោយប្រទះឃើញធុងពណ៌បៃតងមួយ ច្នៃដាក់ស្កររងូ (កាកស្ករ) មួយកំណាត់លើនិងបិទសន្ទះពីក្នុង គ្រានោះកម្លាំងសមត្ថកិច្ចក៏បានសម្រេចកាត់ធុងប្រទះឃើញកញ្ចប់ថ្នាំញៀនដោយបង្កប់ជាមួយដីខ្សាច់ចំនួន១៣កញ្ចប់
ធំ។
សមត្ថកិច្ចអោយដឹងទៀតថាជនសង្ស័យ ជនជាតិឡាវខាងលើទី១ឈ្មោះកែវ គង់មឿង ភេទប្រុសអាយុ២៣ឆ្នាំ កើតនៅភូមិ ចមកែវ ស្រុកកៃសនខេត្ត សុវណ្ណខេត្ត ទី២ឈ្មោះ ណុក សុវណ្ណសាម ភេទប្រុសអាយុ ២០ឆ្នាំ កើតនៅភូមិណាសៃ ស្រុកហ្វឿង រាជធានីវៀងច័ន្ទ ប្រទេសឡាវ។
ក្រោយឃាត់ខ្លួនបានជនសង្ស័យទាំងពីរនាក់ខាងលើរួមជាមួយនឹងវត្ថុតាងគ្រឿងញៀនកម្លាំងជំនាញ បានបញ្ជូនមកស្នងការដ្ឋាននគរបាលខេត្តស្ទឹងត្រែង ដើម្បីបន្តនីតិវិធី។
មកដល់ ស្នងការនគរបាលខេត្ត ដោយមានក្រោមការសម្របសម្រួលពីព្រះរាជអាជ្ញា បានហែកកញ្ចប់ថ្នាំញៀន និងធ្វើតេស្តលើវត្ថុតាង គ្រឿងញៀន ជាក់ស្តែងក្រោយធ្វើតេស្ត បញ្ជាក់ថាជាប្រភេទមេតំហ្វេតាមីន មានទម្ងន់សរុប ចំនួន១២.៧៤៥,២ក្រាម។
បច្ចុប្បន្នជនសង្ស័យទាំង២នាក់រួមនិងវត្ថុតាងគ្រឿងញៀន ត្រូវកម្លាំងនគរបាលប្រឆាំងគ្រឿងញៀនកសាងសំណុំរឿងបញ្ជូនទៅតុលាការចាត់ការតាមនីតិវិធី៕
ដោយ៖ អ៊ុល គឹម លាង
