ឧត្ដមសេនីយ៍ឯក លន់ សុផាត ប្រគល់វិញ្ញាបនបត្របញ្ជាក់ការសិក្សា ព្រមទាំងប័ណ្ណសរសេីរ ជូនដល់មន្រ្តីនគរបាលជាតិ នៃស្នងការដ្ឋាននគរបាលខេត្តកំពង់ចាម
ខេត្តកំពង់ចាម៖ នៅព្រឹកថ្ងៃព្រហស្បតិ៍ ទី១៦ ខែមីនា ឆ្នាំ២០២៣នេះ នៅស្នងការដ្ឋាននគរបាលខេត្តកំពង់ចាម បានរៀបចំប្រារព្ធនូវពិធីបើកវគ្គបំប៉នជំនាញ ការពារទប់ទល់នឹងសភាពការណ៍ ដល់កងកម្លាំងអន្តរាគមន៍ពិសេស និងប្រគល់វិញ្ញាបនបត្របញ្ជាក់ការសិក្សា ព្រមទាំងប័ណ្ណសរសើរ ជូនដល់មន្រ្តីនគរបាលជាតិ នៃស្នងការដ្ឋាននគរបាលខេត្តកំពង់ចាម ក្រោមអធិបតីភាព ឯកឧត្តម ឧត្ដមសេនីយ៍ឯក លន់ សុផាត អគ្គស្នងការងនគរបាលជាតិ និងជាតំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម ខ្លូត ចិន្តា អភិបាលរង នៃគណៈអភិបាលខេត្តកំពង់ចាម និងជាតំណាង ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម ។
ពិធីបើកវគ្គនេះដែរ ក៏មានការអញ្ជើញចូលរួមពី លោកឧត្តមសេនីយ៍ វរសេនីយ៍ ប្រតិភូអមដំណើរ លោកឧត្តមសេនីយ៍ស្នងការ ខេត្តកំពង់ចាម-ត្បូងឃ្មុំ លោក-លោកស្រីស្នងការរង អនុប្រធានផែន នាយការិយាល័យជំនាញ លោកអធិការនគរបាលស្រុក-ក្រុងទាំង១០ និងសិក្ខាកាមចំនួន១០០នាក់ ។
ជាកិច្ចចាប់ផ្តើម លោកឧត្តមសេនីយ៍ត្រី ហេង វុទ្ធី ស្នងការនគរបាលខេត្តកំពង់ចាម បានអញ្ជើញឡើងមានចំណាប់អារម្មណ៍លើរបាយការណ៍ស្វាគមន៍ក្នុងអង្គពិធី ដោយគោរពថ្លែងអំណរគុណដល់ថ្នាក់ដឹកនាំគ្រប់ជាន់ថ្នាក់ ពិសេស ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ និងឯកឧត្តម អភិបាល នៃគណៈអភិបាលខេត្តកំពង់ចាម ដែលតែងតែជម្រុញ និងលើកកម្ពស់ដល់ការបណ្ដុះបណ្ដាលធនធានមនុស្ស នៃស្នងការដ្ឋាននគរបាលខេត្តកំពង់ចាម កន្លងមកនេះ ។
លោកឧត្តមសេនីយ៍ស្នងការបានបន្ដលើកឡើងនូវការងារមួយចំនួនដែលស្នងការដ្ឋាននគរបាលសម្រេចបាននាពេលថ្មីៗនេះ
១-អំពីសភាពការណ៍សន្តិសុខ
២-ការងារប្រឆាំងបទល្មើស
៣-ការងារសណ្ដាប់ធ្នាប់សាធារណៈ
៤-ការងារផ្ដល់សេវាសាធារណៈ
៥-ការអនុវត្តគោលនយោបាយ ភូមិ-ឃុំ-សង្កាត់មានសុវត្ថិភាព
៦-ការកសាងអង្គភាព និងទី៧-ការងារបណ្ដុះបណ្ដាលធនធានមនុស្ស ដោយរយៈពេលកន្លងមកនេះ បានអនុវត្តការងារយ៉ាងសកម្មផុលផុសដោយស្មារតីទទួលខុសត្រូវខ្ពស់ និងទទួលបានលទ្ធផលល្អប្រសើរ ដូចដែលបានគ្រោងទុក ។
បន្ទាប់មក ឯកឧត្តម ឧត្តមសេនីយ៍ឯក លន់ សុផាត បាននាំយកនូវការផ្ដាំផ្ញើសាកសួរសុខទុក្ខរបស់ ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ ជូនដល់ថ្នាក់ដឹកនាំ និងមន្ដ្រីទាំងអស់ នៃស្នងការដ្ឋាននគរបាលខេត្តកំពង់ចាម ដោយក្ដីនឹករលឹក។
ឯកឧត្តម ក៏បានវាយតម្លៃខ្ពស់ និងកោតសរសើរចំពោះលទ្ធផលដែលស្នងការដ្ឋាននគរបាលខេត្តកំពង់ចាម សម្រេចបានដោយជោគជ័យនៅពេលកន្លងមកផងដែរ។
ឯកឧត្តម អគ្គស្នងការរងនគរបាលជាតិ បានគូសបញ្ជាក់ទៀតថា នៅមានកិច្ចការចំពោះមុខច្រើនទៀត ដែលកងកម្លាំងទាំងអស់ត្រូវតែរួមគ្នាអនុវត្តតាមអ្វីដែលថ្នាក់ដឹកនាំប្រគល់ជូន។ ជាក់ស្ដែងនៅពេលខាងមុខ កម្ពុជាត្រូវធ្វើជាម្ចាស់ផ្ទះក្នុងការប្រកួតកីឡាស៊ីហ្គេម និងអាស៊ានប៉ារ៉ាហ្គេម ព្រមទាំងព្រឹត្តិការណ៍នៃការបោះឆ្នោតជ្រើសរើសតំណាងរាស្ដ្រ ដែលនឹងប្រព្រឹត្តទៅនៅខែកក្កដា ឆ្នាំ២០២៣ខាងមុខ។
ក្នុងឱកាសនោះដែរ ឯកឧត្ដម អគ្គស្នងការរង និងឯកឧត្តម អភិបាលរងខេត្ត បានអញ្ជើញផ្ដល់កិត្តិយសជាគណៈអធិបតីក្នុងការប្រគល់ប័ណ្ណសរសើរដល់គ្រូបង្គោល នៃស្នងការដ្ឋាននគរបាលខេត្តកំពង់ចាមចំនួន៩នាក់ និងសិក្ខាកាមចំនួន៦៣នាក់ និងបាននាំយកអំណោយដ៏ថ្លៃថ្លារបស់ឯកឧត្ដម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការដ្ឋាននគរបាលជាតិ ឧបត្ថម្ភជាថវិកាដល់ស្នងការដ្ឋាននគរបាលខេត្តកំពង់ចាម ថវិកាចំនួន ៥លានរៀល សម្រាប់ជួយសម្រួលដល់ដំណើរការបណ្ដុះបណ្ដាលវគ្គបំប៉ននេះ និងឧបត្ថម្ភថវិកាដល់សិក្ខាកាម ចំនួន១០០នាក់ ក្នុងម្នាក់ៗ ទទួលបានថវិកា ៤ម៉ឺនរៀល ផងដែរ សរុបជាថវិកាចំនួន៩លានរៀល ផងដែរ ៕
ដោយ៖ គ្រុឌជ័យ
