បាត់ដំបង៖តូបលក់កាហ្វេមួយកន្លែងស្ថិតនៅខាងក្រោយផ្សារភួពុយ ក្រុងបាត់ដំបង ត្រូវបានក្រុមចោរគាស់ចូលលួចយកទ្រព្យសម្បត្តិអស់ជាច្រើន រុករានរាយប៉ាយខ្ទេចខ្ទីគ្មានសល់។
ករណីនេះក្រុមជនសង្ស័យបានធ្វើសកម្មភាពចូលលួចកាលពីយប់ថ្ងៃទី១៦ ខែគុម្ភះ ឆ្នាំ២០២៣ ស្ថិតក្នុងភូមិចំការសំរោង សង្កាត់ចំការសំរោង ក្រុងបាត់ដំបង ខេត្តបាត់ដំបង។
ប្រភពព័ត៌មានពីស្ត្រីម្ចាស់តូប(សុំមិនបញ្ចេញឈ្មោះ)បានបង្ហើបប្រាប់ភ្នាក់ងារព័ត៌មានថា៖តូបកាហ្វេរបស់គាត់មានក្រុមចោរលួចគាស់យកសម្ភារៈ២ដងកន្លងមកហើយ ប៉ុន្តែលើកទី៣នេះពួកវាគាស់ជញ្ជាំងតូបពីក្រោយចូលលួចប្រមូលយកទ្រព្យសម្បត្តិសំខាន់ៗទាំងអស់ បន្សល់ទុកទឹកសុទ្ធចំនួន២កេះនិងកៅអីមួយចំនួនតែប៉ុណ្ណោះ។
សម្ភារៈដែលបាត់បង់រួមមាន៖ម៉ាសុីនឆុងកាហ្វេ១គ្រឿង ម៉ាសុីនកិនកាហ្វេ ១គ្រឿង ធុងបាស់ចំនួន១ ទឹកដោះគោ និងភេសជ្ជៈកំប៉ុងមួយចំនួនទៀត គិតជាទឹកប្រាក់អស់ជាង៤ពាន់ដុល្លារ។
ក្រោយពេលកើតហេតុប្រជាពលរដ្ឋក៍ដូចជាម្ចាស់តូចមានការព្រួយបារម្ភយ៉ាងខ្លាំង ដោយសារក្រុមចោរឆក់ លួចគាស់ បន្តកើតឡើងយ៉ាងសកម្មក្នុងក្រុងបាត់ដំបង។
ដូច្នេះពលរដ្ឋបានសំណូមពរដល់លោកពេជ្រ សារ៉េន អធិការនគរបាលក្រុងបាត់ដំបង បង្កើនសមត្ថភាពដើម្បីអោយភូមិឃុំមានសុវត្ថភាព និងភាពកក់ក្តៅជូនប្រជាពលរដ្ឋដែលរស់នៅក្នុងសង្កាត់ទាំង១០នៃក្រុងបាត់ដំបង ខេត្តបាត់ដំបង៕
ដោយ ៖ សុខ កុសល
