បោកតាម តាមបណ្ដាញទំនាក់ទំនងសង្គម បានលុយប្រមាណជាង ១០ម៉ឺន ដុល្លារ សហរដ្ឋអាមេរិក….!
រាជធានីភ្នំពេញ ៖ សមត្ថកិច្ច បញ្ជាក់ថា កាលពីថ្ងៃទី ០៧ ខែកុម្ភៈ ឆ្នាំ ២០២៣ កម្លាំងជំនាញនៃការិយាល័យប្រឆាំងបទល្មើសទូរគមនាគមន៍នៃនាយកដ្ឋានប្រឆាំងបទល្មើសបច្ចេកវិទ្យា សហការជាមួយកម្លាំងស្នងការដ្ឋាននគរបាលរាជធានីភ្នំពេញ និងដឹកនាំដោយអយ្យការអមសាលាដំបូងរាជធានីភ្នំពេញ បានធ្វើការឃាត់ខ្លួន ជនសង្ស័យ ពីររូប
ទី១ បុរសជនជាតិ នីហ្សេរីយ៉ាម្នាក់ អាយុ៤១ឆ្នាំ
ទី២ នារីជនជាតិខ្មែរម្នាក់ អាយុ៣៩ឆ្នាំ ពាក់ព័ន្ធករណី ឆបោក តាមបណ្ដាញទំនាក់ទំនងសង្គម លើជនរងគ្រោះម្នាក់អស់ទឹកប្រាក់ប្រមាណជាង ១០ម៉ឺន ដុល្លារ សហរដ្ឋអាមេរិក។
ជនសង្ស័យ ជានារីខ្មែរ មានមុខរបរ ជាអ្នកលក់ដូរ នៅផ្សារ ជាអ្នកដើរបញ្ចុះបញ្ចូល អ្នកជិតខាងនិងអ្នកភូមិ ដើម្បីឱ្យទៅបង្កើតគណនីធនាគារផ្សេងៗហើយលក់គណនីធនាគារនោះមកឱ្យខ្លួនហើយខ្លួនបានលក់បន្តទៅឱ្យជនសង្ស័យដែលជាបុរស សញ្ជាតិនីហ្សេរីយ៉ាខាងលើ ។
ជនសង្ស័យ ដែលជាបុរស សញ្ជាតិនីហ្សេរីយ៉ា បានទិញគណនីធនាគារ ជាច្រើនយកមកគ្រប់គ្រង ដើម្បីជាមធ្យោបាយក្នុងការឆបោកជនរងគ្រោះឱ្យផ្ញើប្រាក់មកគណនីទាំងនោះ ហើយខ្លួនដកប្រាក់ទាំងនោះតាមបញ្ជរទូរ ATM ដើម្បីលាក់អត្តសញ្ញាណរបស់ខ្លួន។
បន្ទាប់ពីឃាត់ខ្លួនបាន មន្ត្រីជំនាញបានរកឃើញថា ជនសង្ស័យ បានបោកប្រាស់ជនរងគ្រោះជាច្រើននាក់ផ្សេងទៀតតាមរូបភាពមនោសញ្ចេតនា ស្នេហាពី បរទេស ទំនាក់ទំនង ពាណិជ្ជកម្ម និងទំនាក់ទំនងបញ្ញើកញ្ចប់អីវ៉ាន់ជាដើម។ បន្ទាប់មកជនសង្ស័យបានឱ្យបក្ខពួកបន្លំខ្លួនជាមន្ត្រីមានសមត្ថកិច្ចទាក់ទងមកជនរងគ្រោះថា ត្រូវបង់ថ្លៃសេវាដើម្បីសម្រួលក្នុងការយកប្រាក់ ឬវត្ថុមានតម្លៃចេញពីច្រកទ្វារអន្តរជាតិដូចជា អាកាសយានដ្ឋានអន្តរជាតិសៀមរាបជាដើម។
នៅព្រឹកថ្ងៃទី ៩ ខែកុម្ភៈឆ្នាំ ២០២៣ ជនសង្ស័យទាំងពីរត្រូវបាននាយកដ្ឋានកសាងសំណុំរឿងបញ្ជូនទៅតុលាការ ដើម្បីអនុវត្តតាមនីតិវិធីច្បាប់។
នាយកដ្ឋានប្រឆាំងបទល្មើសបច្ចេកវិទ្យា សូមក្រើនរំលឹកដល់ប្រជាពលរដ្ឋទាំងអស់ឱ្យមានការប្រុងប្រយ័ត្ន ក្នុងការទុកចិត្តលើជនមិនស្គាល់អត្តសញ្ញាណច្បាស់លាស់ដែលសន្យាផ្ញើប្រាក់ ឬវត្ថុមានតម្លៃ មកពីក្រៅប្រទេស។
បន្ថែមពីនេះ នាយកដ្ឋាន សូមអំពាវនាវឱ្យប្រជាពលរដ្ឋទាំងអស់ មេត្តាកុំលក់ ឬប្រគល់ការគ្រប់គ្រងគណនីធនាគាររបស់ខ្លួន ទៅឱ្យអ្នកដទៃព្រោះអាចប្រឈមមុខពាក់ព័ន្ធនឹងបទផ្សំគំនិត ឬផ្ដល់មធ្យោបាយឱ្យជនល្មើសប្រព្រឹត្តបទល្មើសបាន៕
