ខេត្ដបន្ទាយមានជ័យ ៖ ប្រភពប្រាប់អោយដឹងថា មានករណីគ្រោះថ្នាក់ចរាចរណ៍មួយ បានកើតឡើង រវាងរថយន្តបុករថយន្ត នៅលើដងផ្លូវជាតិលេខ ៥ ត្រង់ចំណុចទាល់មុខសណ្ឋាគារប៉ោយប៉ែតផាស ស្ថិតនៅក្នុងភូមិក្បាលស្ពានពីរ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ បណ្ដាលឲ្យរងរបួសមនុស្សម្នាក់ និងរថយន្ត រងការខូចខាតយ៉ាងដំណំ ។
ហេតុការណ៍នេះបានកើតឡើងនៅព្រឹកថ្ងៃចន្ទ ២កើត ខែមាឃ ឆ្នាំខាល ចត្វាស័ក ព.ស ២៥៦៦ត្រូវនឹងថ្ងៃទី២៣ ខែមករាឆ្នាំ២០២៣នៅវេលាម៉ោង ០៧និង៣៥នាទីព្រឹក ។
សមត្ថកិច្ចបានប្រាប់ឲ្យដឹងថា អ្នកបើកបររថយន្តODស៊េរីទំនើប ពណ៌ស ដែលពាក់ស្លាកលេខភ្នំពេញ 2AQ – 67 79 បានបុក ពីក្រោយរថយន្ត highlander ពាក់ស្លាកលេខភ្នំពេញ2 Z. 7848 បណ្ដាលឲ្យខាងរថយន្ត highlander រងរបួសម្នាក់ដឹកយកទៅសង្គ្រោះនៅឯមន្ទីរពេទ្យនគររាជក្រុងប៉ោយប៉ែត។
ប្រភពពីសមត្ថកិច្ចបានបន្ដឱ្យដឹងទៀតថា រថយន្តODមានគ្នាពីរនាក់ បើកបរទិសដៅពីលិចទៅកើតតាមបណ្ដោយផ្លូវជាតិលេខ ៥លុះ មកដល់ត្រង់ចំណុចទល់មុខ ប៉ោយប៉ែតផាស បានបុករថយន្តhighlander ពីក្រោយ ដែលម្ចាស់កំពុងចតអង្គុយហូបបាយ រង់ចាំចាប់ម៉ូយ និងមានភ្ញៀវអង្គុយក្នុងឡានម្នាក់ផងនោះ បណ្ដាលឲ្យបុរសដែលជាម្ចាស់រថយន្ត highlander រងរបួស ត្រូវបញ្ជូនទៅមន្ទីរពេទ្យ រីឯភ្ញៀវនៅក្នុងឡានមិនបានរងរបួសនោះទេ ចំណែកឯម្ចាស់រថយន្តOD វិញមិនមានរងរបួសអ្វីនោះឡើយដោយបានពោងសុវត្ថិភាពការពារគ្រាន់តែរថយន្តរងការខូចខាតផ្នែកខាងមុខ។
ភ្លាមៗនោះក៏មានសមត្ថកិច្ចជំនាញនគរបាលចរាចរណ៍ ក្រុងប៉ោយប៉ែតបានចុះមកដល់ទីតាំងកើតហេតុហើយធ្វើការវាស់វែងរួចក៏យករថយន្តទាំង២គ្រឿង ទៅរក្សាទុកនៅអធិការដ្ឋាននគរបាលក្រុងប៉ោយប៉ែតដើម្បីរង់ចាំដោះស្រាយគ្នាតាមនីតិវិធីនៅពេលក្រោយ ៕
