ពលរដ្ឋជាគ្រួសារ អតីតយុទ្ធជន មានជីវភាពក្រីក្រជួបការលំបាកខ្លាំង នៅស្រុកស្វាយជ្រំ ៩០គ្រួសារ ទទួលអំណោយពីសប្បុរសជន

ខេត្ដស្វាយរៀង ៖ នាព្រឹកថ្ងៃទី១២ ខែមករា ឆ្នាំ២០២៣នេះ លោកជំទាវ កែវ ណារី ម្ចាស់សណ្ឋាគារ ណា រី ស្វិតក្រុងបាវិត ខេត្ដស្វាយរៀង និងក្រុមហ៑ុនម៉ាដាមស្អាត បានដឹកនាំក្រុមការងារ នាំយកអំណោយ ជាសម្ភារ និងថវិកា មួយចំនួន តាមរយៈ លោកវរសេនីយ៍ទោ សោម សុភ័ណ្ឌ អធិការនគរបាលស្រុកស្វាយជ្រំ ទៅចែកជូនដល់ ប្រជាពលរដ្ឋដែលជាគ្រួសារអតីតយុទ្ធជន ជនពិការ និងចាស់ជរា ដែលមានជីវភាពខ្វះខាតខ្លាំងងាយរងគ្រោះចំនួន ៩០គ្រួសារ នៅក្នុងស្រុកស្វាយជ្រំ ពិធីនេះធ្វើឡើងនៅអធិការនៃអធិការរដ្ឋាននគរបាលស្រុកស្វាយជ្រុំ ស្ថិតក្នុងភូមិតាប៉ ឃុំតាសួស ស្រុកស្វាយជ្រំ ខេត្ដស្វាយរៀង ។

នៅក្នុងពិធីនោះក៏មានការអញ្ចើញចូលរួមពីសំណាក់លោកជំទាវ កែវ ណារី ម្ចាស់សណ្ឋាគារ ណា រី ស្វិតក្រុងបាវិត លោកឧត្តមសេនីយ៍ត្រី អ៊ូ វណ្ណារិទ្ធ ស្នងការរងតំណាងដ៏ខ្ពង់ខ្ពស់លោកឧត្តមសេនីយ៍ស្នងការនគរបាលខេត្តស្វាយរៀង លោកអធិការ លោកលោកស្រីអធិការរង លោកលោកស្រីនាយផ្នែក នាយរងផ្នែក ក្រុមការងាររបស់សណ្ឋាគារ ណា រី ស្វិតក្រុងបាវិត និង ក្រុមហ៊ុនម៉ាដាមស្អាត និងតំណាងបងប្អូនប្រជាពលរដ្ឋអតីតយុទ្ធជន ជនពិការ និងចាស់ជរាទាំង៩០គ្រួសារ។

ដោយមើលឃើញពីទុក្ខលំបាករបស់បងប្អូនប្រជាពលរដ្ឋជាគ្រួសារអតីតយុទ្ធជន ជនពិការ និងចាស់ជរាទាំង៩០គ្រួសារនេះនៅក្នុងមូលដ្ឋានស្រុកស្វាយជ្រំដែលមានជីវភាពភាពក្រីក្រខ្វះខាតខ្លាំងទើបលោកអធិការនគរបាលស្រុកស្វាយជ្រំ បានស្នើសុំលោកជំទាវលោកជំទាវ កែវ ណារី ម្ចាស់សណ្ឋាគារ ណា រី ស្វិតក្រុងបាវិត និងក្រុមហ៊ុនម៉ាដាមស្អាត ជាអំណោយមានសម្ភរៈជាគ្រឿងឧបភោគ បរិភោគ និងថវិកា មួយចំនួនមកចែកជូនដើម្បីជួយសម្រាលដល់ទុក្ខលំបាករបស់ពួកគាត់បានមួយគ្រាផងដែរ។

នៅក្នុងពិធីនោះដែរលោកជំទាវក៏បានមានប្រសាសន៍សាកសួរសុខទុក្ខ ហើយបានផ្តាំផ្ញើដល់បងប្អូនប្រជាពលរដ្ឋទាំងអស់ត្រូវថែ រក្សាការពារសុខភាពឲ្យបានល្អ ជាពិសេសត្រូវប្រកាន់ភ្ជាប់នូវវិធានការ 《៣កុំ ៣ការពារ》ឲ្យបានខ្ជាប់ខ្ជួន ហើយត្រូវមានអនាម័យជានិច្ចដើម្បីការពារនូវជំងឺឆ្លងកូវីដ-១៩ ។

អំណោយដែលនាំយកទៅចែកជូនដល់ពលរដ្ឋជាគ្រួសារអតីតយុទ្ធជនមានជីវភាពខ្វះខាតជួបការលំបាកខ្លាំងក្នុងមួយគ្រួសារៗទទួលបាន រួមមាន ៖ អង្ករចំនួន ២៥គីឡូក្រាម, មី០១កេស, ត្រីខ០១យួរ, ទឹកស៊ីអីវ០១យួរ, ទឹកត្រី០១យួរ, សារ៉ុង០១ ក្រមា ០១ និង ថវិកាចំនួន ៥ម៉ឺនរៀល ហើយលោកជំទាវក៏បានឧបត្ថម្ភដល់កម្លាំងនគរបាលស្រុកស្វាយជ្រំចំនួន៤០នាក់រួមមានក្រមា៣៦ សារ៉ុង០៤ និងថវិកា២,០០០,០០០រៀលផងដែរ។

ឆ្លៀតក្នុងឪកាសនោះដែរលោកវរសេនីយ៍ទោ សោម សុភ័ណ្ឌ អធិការនគរបាលស្រុកស្វាយជ្រំសូមថ្លែងអំណរគុណយ៉ាងជ្រាលជ្រៅដល់លោកជំទាវនិងក្រុមហ៊ុនម៉ាដាមស្អាតព្រមទាំងក្រុមការងារសូមមានសុខភាពល្អ សំណាងល្អ ជោគជ័យគ្រប់ភារកិច្ចការងារ សូមសមប្រកបនូវពុទ្ធពរទាំងបួនប្រការគឺ អាយុវណ្ណៈ សុខៈពលៈ កុំបីឃ្លៀងឃ្លាតឡើយ៕