ករណី នាយរងប៉ុស្តិ៍នគរបាលរដ្ឋបាល ឃុំព្រះស្រែ នៃអធិការដ្ឋាននគរបាលស្រុកឧដុង្គ ដែលរងបណ្ដឹង ពីពលរដ្ឋ៥នាក់ ស្នងការ បំភ្លឺថា…!
ស្នងការដ្ឋាននគរបាលខេត្តកំពង់ស្ពឺ សូមជម្រាបជូនសាធារណៈជននិងអ្នក និយមបណ្ដាញទំនាក់ទំនងសង្គមហ្វេសប៊ុក ជ្រាបថា ៖ រយៈពេលប៉ុន្មានថ្ងៃនេះ មានការចុះផ្សាយអំពី ករណី នាយរងប៉ុស្តិ៍នគរបាលរដ្ឋបាល ឃុំព្រះស្រែ នៃអធិការដ្ឋាននគរបាលស្រុកឧដុង្គ ដែលរងបណ្ដឹងពី ពលរដ្ឋ៥នាក់ ចោទប្រកាន់ថាបានប្រើហិង្សា និងឃាត់ដោយ សង្ស័យជាមុខសញ្ញាប្រើប្រាស់ សារធាតុញៀន នៅក្នុងមូលដ្ឋានឃុំព្រះស្រែ បញ្ជូនមកអធិការដ្ឋាននគរបាលស្រុករួចធ្វើតេស្ដរកសារធាតុញៀន និងឱ្យវិលត្រឡប់ទៅផ្ទះវិញ។
ក្រោយទទួលព័ត៌មានតាមរយៈបណ្ដាញសង្គមផ្សព្វផ្សាយជាបន្ដបន្ទាប់ លោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ បានបញ្ជាឱ្យជំនាញព្រហ្មទណ្ឌចុះទៅមូលដ្ឋានស្រុកឧដុង្គដើម្បីធ្វើការស្រាវជ្រាវទោះបីជាមិនទាន់ទទួលបានបណ្ដឹងណាមួយជាក់លាក់ដោយផ្ទាល់ពីជនរងគ្រោះទាំង៥នាក់ដែលបានផ្ញេីបណ្ដឹង-ប្ដឹងបង្ហោះតាមរយៈព័ត៌មានបណ្ដាញសង្គមក្ដី ក៏សមត្ថកិច្ចស្នងការដ្ឋានត្រូវតែចុះស្រាវជ្រាវស៊េីបបញ្ជាក់ករណីនេះដែរ។
អាស្រ័យហេតុនេះ សូមសាធារណៈជន និងអ្នកនិយមបណ្ដាញទំនាក់ទំនងសង្គមហ្វេសប៊ុក ពិសេសសាមុីខ្លួន ក្នុងបណ្ដឹងមេត្តាចូលរួមសហការជាមួយសមត្ថកិច្ចជំនាញ ដើម្បីស្រាវជ្រាវលើករណីចោទប្រកាន់ខាងលើ។
ជាក់ស្ដែង លោកអនុសេនីយ៍ ភឺន ដេត តួនាទីនាយរងប៉ុស្តិ៍ នគរបាលរដ្ឋបាលឃុំព្រះស្រែ ត្រូវបានស្នងការ ដកយកមកទុកនៅស្នងការដ្ឋាននគរបាលខេត្ដកំពង់ស្ពឺ ជាបណ្ដោះអាសន្ន ដោយទុកលទ្ធភាព លើលទ្ធផលស្រាវជ្រាវ។
ក្នុងនាមស្នងការនគរបាលខេត្ដ សូមអរគុណមហាជន ដែលតែងតែចូលរួមផ្ដល់ព័ត៌មានកិច្ចសហការជាមួយសមត្ថកិច្ចលើកិច្ចការ អសកម្មមួយចំនួន ដើម្បីសេចក្ដីសុខសាន្ដ នៅមូលដ្ឋាន សូមបន្ដផ្ដល់ព័ត៌មាន “ នគរបាលជាអ្នកបម្រើពលរដ្ឋដោយស្មោះត្រង់ “។
