ភ្នំពេញ៖ សមត្ថកិច្ច ប្រាប់អោយដឹងថា មានករណីអគ្គិភ័យ ឆាបឆេះឃ្លាំងលក់រថយន្ត មួយកន្លែង កាលពីវេលាម៉ោង ៥និង០០នាទីថ្ងៃទី១០ ខែមករា ឆ្នាំ២០២៣ ដែលសិ្ថតនៅចំណុចផ្ទះលេខ២៣២ ផ្លូវ១៨២ ភូមិ៦ សង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ។
សមត្ថកិច្ច បញ្ជាក់ថា គ្រោះអគ្គិភ័យឆាបឆេះខាងលេីនេះ គឺបណ្តាលមកពីការឆ្លងក្បាលអាគុយរថយន្ត ម៉ាកលុចស៉ីស LM300 និងបានធ្វើឲ្យខូចខាតរថយន្តចំនួន ៣គ្រឿង ម៉ាក លុចស៉ីស LM300, រថយន្តម៉ាកតូយូតាសូរ៉េនណិ និងរថយន្តម៉ាក បេលី (ពណ៌ខ្មៅទាំង ៣គ្រឿង) ព្រមទាំងសម្ភារៈមួយចំនួន និងពុំបណ្តាលឲ្យឆេះរាលដាលដល់ផ្ទះអ្នកជិតខាងឡេីយ។
នៅវេលាម៉ោង ៥និង៣០នាទីព្រឹកនាថ្ងៃខែឆ្នាំដដែល អគ្គិភ័យនេះត្រូវបានពន្លត់បានទាំងស្រុង ដោយប្រើប្រាស់រថយន្តការិយាល័យអគ្គិភ័យ រាជធានីភ្នំពេញ ចំនួន ១៧គ្រឿង ប្រេីប្រាស់ទឹកអស់ ១៧ឡាន ស្មើរនឹង ៦៨ម៉ែត្រគូប៕
