ដំណើរការឡើងវិញហើយ! បនល្បែងស៊ីសងជល់មាន់ តាមអនឡាញ បង្កប់ក្នុងអាហារដ្ឋាន និង KTV គីម ៨៨៨! សមត្ថកិច្ចថា ព័ត៌មាន យករូបភាពចាស់មកផ្សាយ!
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល មានកិត្តិយសសូមឆ្លើយតបទៅនឹងគេហទំព័រសារព័ត៌មាន ខេអេស ញូវ ធីវី ដែលបានចុះផ្សាយថា ៖ ដំណើរការ ឡើងវិញហើយ
បនល្បែងស៊ីសងជល់មាន់ តាមអនឡាញបង្កប់ក្នុងអាហារដ្ឋាន និងKTV គីម ៨៨៨ នៅតាមបណ្តាយមាត់ប្រឡាយជប៉ុនក្នុងឃុំបាគូរ ស្រុកកណ្តាលស្ទឹង។
ក្រោយពីទទួលបានព័ត៌មានភ្លាម លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានចាត់ឱ្យលោកអធិការនគរបាលស្រុកកណ្តាលស្ទឹង ស្រាវជ្រាវករណីខាងលើ ជាលទ្ធផល៖
នៅរសៀលថ្ងៃទី៥ ខែមករា ឆ្នាំ២០២៣ វេលាម៉ោង ១៣ និង៣០នាទី លោកវរសេនីយ៍ឯក ឡេង សុខរុន អធិការនគរបាលស្រុកកណ្ដាលស្ទឹង បានបញ្ជាកម្លាំងផ្នែកនគរបាលយុត្តិធម៌ ដឹកនាំដោយ លោកវរសេនីយ៍ទោ ស៊ឹម គឹមស៊ុន អធិការរងផ្នែកនគរបាលយុត្តិធម៌ ដឹកនាំមន្រ្តីជំនាញ និងប៉ុស្តិ៍នគរបាលរដ្ឋបាលបារគូ ចុះទៅដល់ទីតាំង KTV គីម ៨៨៨ មួយកន្លែងដែលម្ចាស់ទីតាំង ឈ្មោះ មៀង ពុទ្ធាវី ភេទប្រុស រស់នៅភូមិ អូអណ្ដូង ឃុំបារគូ ស្រុកកណ្ដាលស្ទឹង ខេត្តកណ្ដាល។
តាមការបំភ្លឺម្ចាស់ទីតាំង បានឱ្យដឹងថាទីតាំងរបស់ខ្លួនមិនមានលេងល្បែងស៊ីសងខុសច្បាប់ឡើយ ចំពោះរូបភាពដែលសារព័ត៌មានយកចុះផ្សាយគឺរូបភាពចាស់ ព្រោះទីតាំងនេះឈប់ដំណើរយូណាស់ មកហើយ និងបានធ្វើកិច្ចសន្យាបញ្ឈប់ការបើកទីតាំង KTV និងល្បែងស៊ីសងខុសច្បាប់។
ចំពោះលទ្ធផលការពិនិត្យឃើញថា នៅទីតាំងលក់កាហ្វេ ខាងលើ មិនមានលេងល្បែងស៊ីសងខុសច្បាប់ឡើយ ។
ករណីខាងលើនេះសមត្ថកិច្ចជំនាញស្រុក បានធ្វើកិច្ចសន្យាអប់រំណែនាំបន្ថែមដល់ម្ចាស់ទីតាំង ហាមដាច់ខាតការផ្តល់ទីតាំងឱ្យលេង ឬបើកលេងល្បែងស៊ីសងខុសច្បាប់គ្រប់ប្រភេទ។
អាស្រ័យហេតុនេះ សូមសាធារណជន និងបណ្តាញសារព័ត៌មាន ជ្រាប និងកុំមានការភាន់ច្រឡំ៕
