លោកឧត្តមសេនីយ៍ទោ ឈឿន ប៊ុនឆន ចុះសួរសុខទុក្ខ និងនាំយកថវិកាជាង ២៨លានរៀល របស់ថ្នាក់ដឹកនាំអគ្គស្នងការដ្ឋាននគរបាលជាតិ ប្រគល់ជូនលោកវរសេនីយ៍ទោ យ៉ាវ រិទ្ធី ដែលជួបគ្រោះថ្នាក់ក្នុងពេលបំពេញបេសកកម្ម

ភ្នំពេញ៖ លោកឧត្តមសេនីយ៍ទោ ឈឿន ប៊ុនឆន ប្រធាននាយកដ្ឋានវិទ្យុទាក់ទង និងសហការី នៅព្រឹកថ្ងៃទី ១៥ ខែ ធ្នូ ឆ្នាំ ២០២២ នេះ បានអញ្ជើញចុះសាកសួរសុខទុក្ខ និងនាំយកថវិកាជាង ២៨លានរៀល របស់ថ្នាក់ដឹកនាំអគ្គស្នងការដ្ឋាននគរបាលជាតិ ប្រគល់ជូនលោកវរសេនីយ៍ទោ យ៉ាវ រិទ្ធី នាយរងការិយាល័យបច្ចេកទេស ដែលទទួលរងគ្រោះថ្នាក់ក្នុងពេលបំពេញបេសកកម្មការងារឡើងដំឡើងអង់តែនចល័តលើដំបូលឡាន បណ្តាលឱ្យធ្លាក់របួសធ្ងន់ដល់ឆ្អឹងខ្នង ។

ក្នុងឱកាសនោះ លោកឧត្តមសេនីយ៍ទោ ឈឿន ប៊ុនឆន បានពាំនាំនូវប្រសាសន៍ផ្តាំផ្ញើសាកសួរសុខទុក្ខ និងលើកទឹកចិត្តពីសំណាក់ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងសូមជូនពរឱ្យលោកវរសេនីយ៍ទោ យ៉ាវ រិទ្ធី ឆាប់ជាសះស្បើយពីជំងឺ ពិសេសលេបថ្នាំឱ្យបានទៀងទាត់តាមវេជ្ជបញ្ជា ដើម្បីឆាប់បានចូលបម្រើការងារជូនអង្គភាពវិញ ។ 

លោកឧត្តមសេនីយ៍ទោប្រធាននាយកដ្ឋាន ក៏បានថ្លែងការកោតសរសើរ និងលើកទឹកចិត្តចំពោះលោកវរសេនីយ៍ទោ យ៉ាវ រិទ្ធី ដែលបានខិតខំប្រឹងប្រែងបំពេញភារកិច្ច រហូតជួបគ្រោះថ្នាក់រងរបួសឆ្អឹងខ្នង ។

ក្រោយពីសាកសួរសួរសុខទុក្ខរួចមក លោកឧត្តមសេនីយ៍ទោ ឈឿន ប៊ុនឆន ប្រធាននាយកដ្ឋានវិទ្យុទាក់ទង បានប្រគល់ជូននូវថវិការបស់ថ្នាក់ដឹកនាំអគ្គស្នងការដ្ឋាននគរបាលជាតិ និងថវិកាដែលកើតចេញពីទឹកចិត្ត និងចែករំលែករបស់បងប្អូននៅក្នុងនាយកដ្ឋាន ឧបត្ថម្ភដល់លោកវេសេនីយ៍ទោ យ៉ាវ រិទ្ធី ចំនួន ២៨.២៧០.០០០រៀល ( ម្ភៃប្រាំបីលាន ពីររយចិតសិបពាន់រៀលគត់) ក្នុងនោះមាន៖ នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ថវិកាចំនួន ៤.០០០.០០០រៀល, សមាគមមិត្តនគរបាលជាតិ ថវិកាចំនួន ២.០០០.០០០រៀល, លោក ឧត្តមសេនីយ៍ឯក ឡោ សុឡេង ថវិកាចំនួន ៤.០០០.០០០រៀល, លោក ឧត្តមសេនីយ៍ឯក ឆាន សុវណ្ណរិទ្ធ ថវិកាចំនួន ២.០០០.០០០រៀល, លោក ឧត្តមសេនីយ៍ឯក ប៊ុន ប៉ាម៉ារីលុច ថវិកាចំនួន ២.០០០.០០០រៀល, លោក ឧត្តមសេនីយ៍ឯក ទូច ពលៈ ថវិកាចំនួន ២.០០០.០០០រៀល, លោកឧត្តមសេនីយ៍ទោ ឈឿន សុចិត្ត ថវិកាចំនួន ៤.០០០.០០០រៀល, លោកឧត្តមសេនីយ៍ទោ ឈឿន ប៊ុនឆន ថវិកាចំនួន ២.០០០.០០០រៀល និងមន្ត្រីក្នុងនាយកដ្ឋានវិទ្យុទាក់ទង ថវិកាចំនួន ៦.២៧០.០០០រៀល ។

សូមជម្រាបថា លោកវរសេនីយ៍ទោ យ៉ាវ រិទ្ធី នាយរងការិយាល័យបច្ចេកទេស បានទទួលរងគ្រោះថ្នាក់កាលពីថ្ងៃទី ២ ខែ វិច្ឆិកា ឆ្នាំ ២០២២ កន្លងទៅ ខណៈលោកកំពុងបំពេញភារកិច្ចឡើងដំឡើងអង់តែនចល័តលើដំបូលឡាន ហើយក៏បានធ្លាក់បណ្តាលឱ្យរបួសធ្ងន់ដល់ឆ្អឹងខ្នង ។ បច្ចុប្បន្នកំពុងសម្រាកព្យាបាលជំងឺនៅគេហដ្ឋានស្ថិតនៅបូរី ឃិត ឈឿន ផ្ទះលេខ535 ភូមិដំណាក់ សង្កាត់គោកឃ្លាង ខណ្ឌសែនសុខ រាជធានីភ្នំពេញ ៕