កីឡារាំកម្ពុជា ដណ្ដើមមេដាយ១៧គ្រឿង ពីជើងឯកពិភពលោក WDSF Super Star Championship 2022 នៅវៀតណាម

ភ្នំពេញ៖ អបអរសាទរ ក្រុមអត្តពលិកជម្រើសជាតិកីឡារាំកម្ពុជា ដណ្ដើមបានមេដាយសរុប១៧គ្រឿង ពីការប្រកួតកីឡារាំដណ្តើមជើងឯកពិភពលោក WDSF Super Star Championship 2022 នៅទីក្រុងហូជីមិញ ប្រទេសវៀតណាម។

ព្រឹត្តិការណ៍ខាងលើនេះ មានប្រទេសចូលរួមចំនួន១៥ រួមមាន៖ កម្ពុជា អូស្ដ្រាលី ចិន អាល្លឺម៉ង់ អ៊ីតាលី ប៉ូឡូញ ឆាយនីសតៃប៉ិ ហុងកុង ម៉ុងហ្គោលី បារាំង កូរ៉េខាងត្បូង ម៉ាឡេស៊ី ឥណ្ឌូនេស៊ី សិង្ហបុរី និងម្ចាស់ផ្ទះវៀតណាម។ ការប្រកួតដំណើរការ រយៈពេល០៣ថ្ងៃ គឺចាប់ពីថ្ងៃទី១១ ដល់ថ្ងៃទី១៣ ខែវិច្ឆិកា ឆ្នាំ២០២២ ខណៈសហព័ន្ធកីឡារាំកម្ពុជា បានបញ្ជូនប្រតិភូ គ្រូបង្វឹក និងកីឡាករ កីឡាការិនី ចូលរួមសរុប ចំនួន១៣រូបផងដែរ។

គួរជម្រាបជូនថា មេដាយទាំង១៧គ្រឿង ដែលអត្តពលិកកីឡារាំកម្ពុជា ប្រជែងបាន រួមមាន៖ មេដាយមាស០៤ ប្រាក់១០ និងសំរឹទ្ធ០៣គ្រឿង។ ក្នុងចំណោមនោះ អត្តពលិក០៤រូប របស់ក្រសួងមហាផ្ទៃ រួមមាន៖ កីឡាករ សេង សុគីម កីឡាការិនី ម៉ូវ ដានីតា ប្រជែងបានមេដាយមាស០២ ប្រាក់០៤ និងមេដាយសំរឹទ្ធ០១គ្រឿង ក្នុងប្រភេទវិញ្ញាសារាំគូ ខណៈកីឡាការិនី សាន រ៉ូហ្សា ប្រជែងបានមេដាយមាស០២ វិញ្ញាសារាំឯកត្តជន និងមេដាយប្រាក់០១ ដែលប្រកួតលើប្រភេទវិញ្ញសារាំគូជាមួយកីឡាករ ភុន ស៊ីវុត្រា។

សរុបជារួម ក្រុមអត្តពលិករាំរបស់ក្រសួងមហាផ្ទៃ ដណ្តើមបានមេដាយសរុបចំនួន០៨គ្រឿង ពីការប្រកួតកីឡារាំដណ្តើមជើងឯកពិភពលោក WDSF Super Star Championship 2022 នៅទីក្រុងហូជីមិញ ប្រទេសវៀតណាម៕

អត្ថបទដែលជាប់ទាក់ទង
Open

Close