ឧកញ៉ាដ៏មានឥទ្ធិពលរូបណា ជាអ្នកឧបត្ថម្ភកាំជ្រួច ជិត១ពាន់ដើម បាញ់ផ្អើល អាកាសា និងក្រុងតាខ្មៅ ក្នុងពិធីប្រណាំងទូកនាមាត់ទន្លេបាសាក់ក្រុងតាខ្មៅ?

កណ្តាល៖ ឧកញ៉ាដ៏មានឥទ្ធិពលមួយរូប នៅក្រុងតាខ្មៅ ដែលគេស្គាល់ថា ជាឪពុកបង្កើតរបស់ លោកអភិបាលស្រុកកៀនស្វាយបច្ចុប្បន្ន និងជាដន្លងរបស់ប្រធានក្រុមប្រឹក្សាខេត្តកណ្ដាល ដ៏មានអំណាចគឺ ឧកញ៉ា ឡូវ ហ៊ឹង ជាអ្នកឧបត្ថម្ភកាំជ្រួចចំនួន ៩១៦ដើម បាញ់ផ្អើលអាកាសា និងក្រុងតាខ្មៅ ទាំង២យប់ថ្ងៃទី២៩-៣០ ខែតុលា ឆ្នាំ២០២២ នៅក្នុងពិធីប្រណាំងទូកនាមាត់ទន្លេបាសាក់ក្រុងតាខ្មៅ ខេត្តកណ្តាល។ នេះបើយោងតាមប្រភពជិតស្និទ្ធមួយដែលបណ្តាញព័ត៌មានយើង ទទួលបាននៅយប់ថ្ងៃទី៣១ ខែតុលា ឆ្នាំ២០២២នេះ។

តាមប្រភពបានបន្តទៀតថា ក្នុងពិធីប្រណាំងទូកក្រុងតាខ្មៅរយះពេល២យប់នេះ រដ្ឋបាលខេត្តកណ្ដាលបាញ់កាំជ្រួចអស់ចំនួនប្រមាណជា៩១៦ដើម ក្នុងនោះ យប់ទី១ អស់ចំនួន៦៨៤ ធំ៣១០ដើម តូច៣៧៤ដើម និងនៅយប់ថ្ងៃទី២ អស់ចំនួន២៣២ដើម គឺប្រភេទធំទាំងអស់។

គួរជម្រាបជូនថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានអញ្ជើញជាអធិបតីភាពដ៏ខ្ពង់ខ្ពស់បិទពិធីប្រណាំងទូកនៅក្នុងក្រុងតាខ្មៅ ខេត្តកណ្តាលនៅរសៀលថ្ងៃអាទិត្យ ទី៣០​ ខែតុលា ឆ្នាំ២០២២នេះ។

គួរបញ្ជាក់ថា ពិធីបុណ្យអុំទូកដែលរៀបចំឡើងដោយរដ្ឋបាលខេត្តកណ្តាល មានរយៈពេលពីរថ្ងៃ ចាប់ផ្តើមថ្ងៃទី២៩ ខែតុលា ហើយបញ្ចប់នៅថ្ងៃទី៣០ ខែតុលានេះ។ ពិធីបុណ្យអុំទូកនេះរៀបចំឡើង ដើម្បីអបអរសាទរខួបលើកទី១៨ នៃការយាងគ្រងព្រះបរមសិរីរាជសម្បត្តិរបស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រខ្មែរ, អបអរសាទរខួបលើកទី៦៩ ពិធីបុណ្យឯករាជជាតិ និងទិវាកំណើតកងយោធពលខេមរភូមិន្ទ និងដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប អកអំបុក និង សំពះព្រះខែ។

ពិធីបុណ្យអុំទូកនេះ មានទូកចូលរួមចំនួន ៩២ទូក និងមានកីឡាករ កីឡាការិនីចំណុះទូកចំនួន ៥,៣៣០នាក់។ ក្នុងនោះ ទូកអុំបុរស ៤៧ទូក ទូកចែវ ៧ទូក ទូកខ្នាតអន្តរជាតិ ៣៩ទូក និងទូកខ្នាតអន្តរជាតិជានារី ៤ទូក។ ដោយឡែកចំពោះទូកដែលបានចូលរួមប្រណាំងនេះ នៅក្នុងខេត្តកណ្តាលមានចំនួន ៧២ទូក, ភ្នំពេញ ៩ទូក, កំពង់ចាម ៤ទូក, ព្រៃវែង ២ទូក, តាកែវ ១ទូក, កំពង់ឆ្នាំង ១ទូក និងក្រសួងការងារចំនួន ៣ទូក។

ក្រោយការប្រកួតរយៈពេល០២ថ្ងៃនេះ ទូកគូពិសេសដែលទទួលបានចំណាត់ថ្នាក់លេខ១ បានទៅលើទូកឈ្មោះ «សារាយតេជោសែនជ័យ, ចំណាត់ថ្នាក់លេខ២ បានទៅលើទូកឈ្មោះគិរីវង់សុខសែនជ័យ និងចំណាត់ថ្នាក់លេខ៣ បានទៅលើទូកឈ្មោះ រតនៈកុមារតេជោសែនជ័យ»។

សូមបញ្ជាក់ថា ក្នុងពិធីបុណ្យទុំទូកនៅខេត្តកណ្តាលនេះ រដ្ឋបាលខេត្ត ក៏បានរៀបចំស្តង់ពិព័រណ៍លក់ផលិតផល ការប្រគុំតន្ត្រី បណ្តែតប្រទីប និងបាញ់កាំជ្រួច។ ថ្ងៃទី១ បាញ់កាំជ្រួចចំនួន ៨០០គ្រាប់ និងថ្ងៃទី២ បាញ់ចំនួន ៣៣០គ្រាប់ និងមានអ្នកចូលរួមដើរកំសាន្តសប្បាយរីករាយសរុបប្រមាណ១១ម៉ឺននាក់៕