ត្រីងៀត ឆ្លៀតពង បានមែន! ចៅសង្កាត់តាខ្មៅបញ្ជាឱ្យកូនចៅដើរទារលុយពីអ្នកលក់ដូរ ក្នុងពិធីប្រណាំងទូក..!

កណ្តាល៖ ពិតជាត្រីងៀតឆ្លៀតពងប្រាកដមែន ចៅសង្កាត់តាខ្មៅ លោក ជៀម ខូយ បានបញ្ជាឱ្យកូនចៅក្រោមអំណាចរបស់ខ្លួនដើរទារលុយពីអ្នកលក់ដូរមួយកន្លែងស្មើនឹងចំនួន២០០០រៀល ក្នុងពិធីប្រណាំងទូក នៅមាត់ទន្លេបាសាក់ក្រុងតាខ្មៅ ខណៈពេលដែលសម្ដេចតេជោ ហ៊ុនសែន នាយករដ្ឋមន្ត្រីនៃកម្ពុជាបានកំពុងតែសប្បាយរីករាយជាមួយបងប្អូនអាជីវករ ប្រជាពលរដ្ឋ និងបងប្អូនចំណុះទូក ង នាថ្ងៃទី៣០ ខែតុលា ឆ្នាំ២០២២នេះ។ នេះបើតាមប្រភពព័ត៌មានដែលភ្នាក់ងារព័ត៌មានយើង ទើបទទួលបាននៅល្ងាចថ្ងៃទី៣០ ខែតុលានេះ។

ប្រភពព័ត៌មានបានបន្តទៀតថា បច្ចុប្បន្នជនល្មើសជាកូនចៅរបស់លោកចៅសង្កាត់តាខ្មៅ ជៀម ខូយ កំពុងត្រូវបានកម្លាំងសមត្ថកិច្ចនគរបាលរបស់ស្នងការដ្ឋាននគរបាលខេត្តកណ្តាលធ្វើការឃាត់និងកំពុងសួរនាំតាមនីតិវិធីនៅទីបញ្ជាការស្រាលនាមាត់ទន្លេក្រុងតាខ្មៅនាល្ងាចថ្ងៃទី៣០ តុលានេះ។

គួរជម្រាបជូនថា នៅរសៀលថ្ងៃទី៣០ ខែតុលា ឆ្នាំ២០២២នេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានអញ្ជើញជាអធិបតីដ៏ខ្ពង់ខ្ពស់ចូលរួមអបអរសាទរក្នុងពិធីប្រណាំងទូកនៅមាត់ទន្លេបាសាក់ក្រុងតាខ្មៅ ដើម្បីជាការអបអរសាទរនៅព្រះរាជពិធីអំទូក អកអំបុក បណ្ដែតប្រទីប និងសំពះព្រះខែខាងពេលខាងនោះ ក្រោមបរិយាកាសដ៏សប្បាយរីករាយបំផុត៕