បាត់ដំបង៖ករណីគ្រោះថ្នាក់ចរាចរណ៍យ៉ាងរន្ធត់បានកើតឡើងមួយលើក រវាងរថយន្តព្រុស និងរថយន្តដឹកទំនិញធន់ធំ (ដឹកថ្ម) បង្កអោយមានការភ្ញាក់ផ្អើលដល់ប្រជាពលរដ្ឋ និងសមត្ចកិច្ចមូលដ្ឋានបានចុះទៅអន្តរាគមន៍នៅចំណុចកើតហេតុ។
ហេតុការណ៍នេះបានកើតឡើងនៅវេលាម៉ោង៣និង៣០នាទីល្ងាចថ្ងៃទី៧ ខែតុលា ឆ្នាំ២០២២ នៅតាមបណ្តោយផ្លូវហាយវេ ស្ឋិតក្នុងភូមិកំពង់អំពិល ឃុំវត្តតាមិម ស្រុកសង្កែ ខេត្តបាត់ដំបង។
ប្រភពព័ត៌មានពីប្រជាពលរដ្ឋបានអោយដឹងថា៖មុនពេលកើតហេតុមានរថយន្តមួយគ្រឿងម៉ាកព្រុស ពណ៌ស ពាក់ស្លាកលេខ ភ្នំពេញ AW-3616 ក្នុងទិសដៅពីត្បូងទៅជើង ឆ្លងផ្លូវហាយវេ ស្របពេលនោះ ស្រាប់តែមានរថយន្តដឹកថ្មមួយគ្រឿង ពណ៌ទឹកប្រាក់ ពាក់ស្លាកលេខ ភ្នំពេញ 3G-1109 បើកបុកលាន់ស្នូរដូចរន្ទះអូសទៅមុខប្រហែល100ម៉ែត្រ បណ្តាលអោយស្លាប់មនុស្សចំនួន៣នាក់ ភ្លាមៗនៅនឹងកន្លែងកើតហេតុ ចំណែកតៃកុងរថយន្តធុនធំបានរត់គេចខ្លួនបាត់ស្រមោលសូន្យឈឹង។
ក្រោយពេលកើតហេតុភ្លាមៗនោះផងដែរកម្លាំងជំនាញនគរបាលចរាចរណ៍ផ្លូវគោកខេត្តបាត់ដំបងបានចុះទៅធ្វើការវាស់វែង និងស្ទូចយករថយន្តទាំងពីរគ្រឿងទៅរក្សាទុកនៅការិយាល័យចរាចរណ៍ ដើម្បីដោះស្រាយតាមផ្លូវច្បាប់៕ ដោយ ៖ សុខ កុសល
