ក្រុមការងារព័ត៌មាន និងប្រតិកម្មរហ័ស នៃអធិការដ្ឋាននគរបាលស្រុកលើកដែក សូមឆ្លើយតបចំពោះគណនីហ្វេសប៊ុក សុំមិនបញ្ចេញឈ្មោះ ដែលបានផ្ញើសារបញ្ចេញមតិក្នុងប្រអប់សារ ផេកហ្វសប៊ុក អធិការដ្ឋាននគរបាលស្រុកលើកដែក ដែលមានខ្លឹមសារថា៖«ចាស នៅក្នុងភូមិញុមមានការលេងបៀរលួចលាក់ជារៀងរាល់ថ្ងៃ ភូមិព្រែកដាច់ ផ្ទតាយឹម យាយសន ញុមអត់មានរូបទេបង តែលេងនៅខាងក្រោយផ្ទះគាត់ មាត់កំពង់»។
ក្រោយពីទទួលបានព័ត៌មានខាងលើភ្លាម និងដោយមានការចង្អុលបង្ហាញផ្ទាល់ពីលោកចាប ច័ន្ទវិទ្យា អភិបាល នៃគណៈអភិបាលស្រុកលើកដែកនិងជាប្រធានគណៈបញ្ជាការឯកភាពស្រុកក្នុងការអនុវត្តន៍បទបញ្ជារបស់រាជរដ្ឋាភិបាលនិងអនុសាសន៍លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល លោកវរសេនីយ៍ឯក អាំ ធូ អធិការនគរបាលស្រុកលើកដែក បញ្ជាឱ្យកម្លាំងប៉ុស្តិ៍នគរបាលរដ្ឋបាលព្រែកដាច់ចុះស្រាវជ្រាវបង្ក្រាបករណីខាងលើ។
ជាលទ្ធផល៖នៅរសៀលថ្ងៃអាទិត្យ១៥រោច ខែភទ្របទ ឆ្នាំខាលចត្វាសក័ព.ស២៥៦៦ ត្រូវនិងថ្ងៃទី២៥ ខែកញ្ញា ឆ្នាំ២០២២ វេលាម៉ោង ១៤និង៣០នាទី កម្លាំងប៉ុស្តិ៍នគរបាលរដ្ឋបាលព្រែកដាច់ និងលោកមេឃុំព្រែកដាច់បានចុះស្រាវជ្រាវដល់ទីតាំងដូចបានរាយការណ៍ ពេលកម្លាំង ចុះទៅដល់បានឃើញមានការលេងល្បែងស៊ីសង (លេងបៀរ) ពិតមែនហើយអ្នកលួច
(លេងបៀរ) ទាំងនោះបានរត់គេចខ្លួនបាត់អស់។
វត្ថុតាងចាប់យករួមមាន៖
-កំរាលក្រាលលេងបៀរចំនួន០២
-ស្បែកជើងចំនួន០៧គូរ
-សន្លឹកបៀរចំនួន ៨៩សន្លឹក
-លុយខ្មែរចំនួន ៦៣០០៛
ចំណាត់ការ៖ កម្លាំងសមត្ថកិច្ច ក៏បានប្រមូលវត្ថុតាងខាងលើ និងបានអញ្ជើញម្ចាស់ទីតាំងឈ្មោះ លាស់ ញឹម ភេទប្រុស អាយុ ៩០ ឆ្នាំ ជនជាតិ ខ្មែរមានទីលំនៅភូមិព្រែកដាច់ ឃុំព្រែកដាច់ស្រុកលើកដែក ខេត្តកណ្ដាលមកប៉ុស្តិ៍ធ្វើកិច្ចសន្យាអប់រំ មិនអោយ បើកលេងល្បែងស៊ីសងខុសច្បាប់បន្តទៀត បើនៅមានលួចបើកលេងល្បែងស៊ីសងខុសច្បាប់បន្តទៀត ត្រូវធ្វើការបង្រ្កាបនិងចាត់ការតាមនីតិវិធី។។
អាស្រ័យហេតុនេះ សូមសាធារណជន មេត្តាជ្រាបជាព័ត៌មាន៕
