ល្បែងសុីសង ជល់មាន់ តាមទូរទស្សន៍ និងអាប៉ោងរីកដូចផ្សិត នៅក្រុងបានលុង អាជ្ញាធរ និង សមត្ថកិច្ច មិនទាន់បង្ក្រាប
ខេត្ដរតនគីរី ៖ មានសេចក្ដីរាយការណ៍មកថា នៅមូលដ្ឋានទឹកដីក្រុងបានលុង ខេត្ដរតនគីរី មានទីតាំង ( ជល់មាន់ )តាមអនឡាញនិងអាប៉ោង ជាច្រេីនកន្លែងរីកដូចផ្សិត កំពុងតែដំណេីរការយ៉ាងរលួនពេញនិយម សំរាប់ក្រុមអ្នកញៀនល្បែង បំផ្លាញទ្រព្យសម្បត្តិ ក្រុមគ្រួសារ និងធ្វេីឲ្យជីវភាពប្រជាពលរដ្ឋ អ្នកញៀនល្បែងមួយចំនួនធ្លាក់ដុនដាប អស់ទ្រព្យសម្បត្តិ អស់ម៉ូតូឡាន ឯក្រុមគ្រួសារខ្លះទៀត ឈានដល់ការឈ្លោះប្រកែក បែកបាក់ លែងលះគ្នាក៏មាន។
សេចក្ដីរាយការណ៍បានបញ្ជាក់ថា ទីតាំងបនល្បែង(ជល់មាន់)តាមទូរទស្សន៍និងអាប៉ោង នៅភូមិទេសអន្លុង សង្កាត់បឹងកន្សែង ក្រុងបានលុង ខេត្តរតនគិរី កំពុងបានក្លាយជាកន្លែងបើកល្បែងសុីសងជល់មាន់តាមអនឡាញនិងអាប៉ោងយ៉ាងពេញបន្ទុក រួមនិងល្បែងខុសច្បាប់ផ្សេងៗជាច្រើន ដោយជ្រកក្រោមស្លាកអាជ្ញាប័ណ្ណល្បែងអនឡាញឡូតូ។
បញ្ហាល្បែង ជល់មាន់ តាមអនឡាញនិងអាប៉ោងនេះប្រជាពលរដ្ឋដែលមិនពេញចិត្តនិងល្បែងសុីសងប្រភេទនេះបានលេីកឡេីងនិងខ្សឹបប្រាប់អ្នកសារព័ត៌មានយើងថា ពួកគាត់មានការព្រួយបារម្មណ៍អំពីសុវត្ថិភាពនិងសន្តិសុខនៅក្នុងមូលដ្ឋានដែលពួកគាត់ រស់នៅខ្លាចកេីតមាននូវអំពេី លួច.ឆក់.ប្លន់.និងអំពេីហិង្សាជាដេីម ព្រោះល្បែងសុីសងជាដេីមចម នៃបទល្មេីស ផ្សេងៗ ។
ប្រជាពលរដ្ឋលេីកឡេីងថា ឯណាទៅពាក្យថា ភូមិ ឃុំ សង្កាត់ មានសុវត្ថិភាពទាំង៧ចំណុច បេីកល្បែងសុីសង រីកដូចផ្សិត ចំណែក អាជ្ញាធរមានសមត្ថកិច្ច ពាក់ពន្ធ័ នៅមូលដ្ឋាន នាំគ្នាសំងំស្ងៀម ដូចត្រូវថ្នាំសណ្ដំ។
សូមរំលឹកថា កន្លងមក សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ធ្លាប់ដាក់បទបញ្ជាឲ្យមន្ត្រីនគរបាលពាក់ពន្ធ័ ទូទាំងប្រទេសត្រូវតែបង្ក្រាបរាល់ល្បែងសុីសងខុសច្បាប់គ្រប់ប្រភេទ មិនត្រូវមានការយោគយល់ឡើយ ដើម្បីធានាសុខសុវត្ថិភាពជួនប្រជាពរដ្ឋ ឲ្យស្របតាម គោល នយោបាយ ភូមិ ឃុំ សង្កាត់ មានសុវត្តិភាព ទាំង៧ចំណុច របស់ រាជរដ្ឋាភិបាល ដែលដាក់ចេញដោយក្រសួងមហាផ្ទៃ ។
បន្ថែមពីលេីនេះទៀត កាលពីថ្ងៃទី១៤ខែកញ្ញាឆ្នាំ២០២២ សម្ដេច ក្រឡា ហោម សខេង បានចេញលិខិតបង្គាប់ការ មួយបញ្ជាឲ្យ ឯកឧត្ដម សន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ ដឹកនាំក្រុមការងារសហការបង្ក្រាបល្បែងសុីសង ខុសច្បាប់គ្រប់ប្រភេទ ទូទាំងប្រទេស ។
មហាជនរងចាំមេីលថាតេី លោក អធិការនគរបាលក្រុងបានលុង និងសហការល្អដឹកនាំកម្លាំងចុះបង្ក្រាបទីតាំងល្បែងសុីសង ជល់មាន់ តាមអនឡាញ និងអាប៉ោងទាំងនោះដែរឬទេ? ៕
