ភ្នំពេញ៖ លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកំរិតស្រាលរាជធានីភ្នំពេញ បញ្ជាក់អោយដឹងថា កាលពីថ្ងៃទី១៤ ខែកញ្ញា ឆ្នាំ២០២២ វេលាម៉ោង២០ និង៣០ នាទី កម្លាំងការិយាល័យបានស្រាវជ្រាវឃាត់ខ្លួនបានជនសង្ស័យចំនួន ២ នាក់ និងចាប់យកវត្ថុតាងម៉ូតូជាមធ្យោបាយ ជិះធ្វើសកម្មភាពចំនួន ២គ្រឿង នៅចំណុចម្តុំត្រឡោកបែក ផ្លូវលេខ ៥៩៨ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ពាក់ព័ន្ធបទល្មើស អំពើលួចមានស្ថានទម្ងន់ទោសដោយសារការប្រព្រឹត្តអំពើហិង្សា (ឆក់យកកាបូបស្ពាយ មិនបានសម្រេច) ប្រព្រឹត្តនៅចំណុចមុខស្ថានីយ៍រថភ្លើង ផ្លូវមុខរ៉ា ភូមិ៥ សង្កាត់ស្រះចក ខណ្ឌដូនពេញ រាជធានីភ្នំពេញ កាលពីថ្ងៃមិនចាំ ខែសីហា ឆ្នាំ២០២២ វេលាម៉ោងប្រហែល ២២ និង ១៥ នាទី បញ្ជូនមកការិយាល័យដើម្បីសាកសួរចាត់ការតាមនីតិវិធី ៖
១-ឈ្មោះ វ៉ាន់ ថាវី ហៅ ពៅ ភេទ ប្រុស អាយុ ២៣ ឆ្នាំ ជនជាតិ ខ្មែរ មុខរបរ បុគ្គលិកក្រុមហ៊ុន កាហ្សា ស្នាក់នៅផ្ទះលេខ៦២ ផ្លូវលំ ភូមិជ្រោយបាសាក់ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ។
២-ឈ្មោះ ប៉ុន ឧត្តម ភេទ ប្រុស អាយុ ២១ ឆ្នាំ ជនជាតិ ខ្មែរ មុខរបរ មិនពិតប្រាកដ ស្នាក់នៅផ្ទះគ្មានលេខ ផ្លូវលំ ភូមិស្ទឹងជ្រៅ សង្កាត់ដើមមៀន ក្រុងតាខ្មៅ ខេត្តកណ្តាល ។
វត្ថុតាងចាប់យក
-ម៉ូតូម៉ាកហុងដាឃ្លីក ពណ៌ស សេរីឆ្នាំ ២០២១ លេខតួ លេខម៉ាស៊ីន ៨០៧៥២៨៣ ពាក់ផ្លាក លេខ ភ្នំពេញ១IX៩៤៦៦
-ម៉ូតូម៉ាកហុងដាឃ្លីក ពណ៌ ស សេរីឆ្នាំ ២០១៩ លេខតួ លេខម៉ាស៊ីន ៥៥៨០៧១៨ ពាក់ ផ្លាកលេខ ភ្នំពេញ១JQ ៨៧១៧
ជនរងគ្រោះមិនស្គាល់អត្តសញ្ញាណ ភេទ ស្រី (មិនដាក់ពាក្យបណ្តឹង)។
សមត្ថកិច្ច បញ្ជាក់ថា កាលពីថ្ងៃមិនចាំ ខែសីហា ឆ្នាំ២០២២ វេលាម៉ោងប្រហែល ២២ និង ១៥ នាទី មានករណី អំពើលួចមានស្ថានទម្ងន់ទោសដោយសារការប្រព្រឹត្តអំពើហិង្សា (ឆក់យកកាបូបស្ពាយ មិនបានសម្រេច) ប្រព្រឹត្តនៅចំណុចមុខស្ថានីយ៍រថភ្លើង ផ្លូវមុខរ៉ា ភូមិ៥ សង្កាត់ស្រះចក ខណ្ឌដូនពេញ រាជធានីភ្នំពេញ បង្កឡើងដោយជនសង្ស័យចំនួន០២នាក់ ជិះម៉ូតូចំនួន០២ គ្រឿង គឺ ឈ្មោះ ប៉ុន ឧត្តម ភេទ ប្រុស អាយុ ២១ ឆ្នាំ ជនជាតិ ខ្មែរ ជិះម៉ូតូម៉ាកហុងដាឃ្លីក ពណ៌ ស សេរីឆ្នាំ ២០២១ ពាក់ផ្លាកលេខ ភ្នំពេញ១IX៩៤៦៦ ម្នាក់ឯង និងឈ្មោះ វ៉ាន់ ថាវី ហៅ ពៅ ភេទ ប្រុស អាយុ ២៣ ឆ្នាំ ជនជាតិ ខ្មែរ ជិះម៉ូតូម៉ាកហុងដាឃ្លីក ពណ៌ ស សេរីឆ្នាំ ២០១៩ ពាក់ផ្លាកលេខ ភ្នំពេញ១JQ ៨៧១៧ ម្នាក់ឯង ចេញពីសួនច្បារមុខវត្តលង្កា ផ្លូវព្រះសីហនុ សង្កាត់ បឹងកេងកង១ ខណ្ឌបឹងកេងកង រាជធានីភ្នំពេញ ចេញធ្វើសកម្មភាពឆក់ទ្រព្យសម្បត្តិរបស់ប្រជាពលរដ្ឋក្នុង រាជធានីភ្នំពេញ ។ នៅពេលជនសង្ស័យនាំគ្នាជិះម៉ូតូមកដល់ចំណុចកើតហេតុខាងលើ ក៏បានឃើញមនុស្សស្រីម្នាក់កំពុងជិះម៉ូតូកង់បីម្នាក់ឯង ដាក់កាបូបស្ពាយនៅលើភ្លៅ ឃើញដូច្នេះជនសង្ស័យឈ្មោះ វ៉ាន់ ថាវី ហៅ ពៅ ជិះម៉ូតូចូលទៅជិតហើយធ្វើសកម្មភាពឆក់យកកាបូបស្ពាយ ពីលើភ្លៅរបស់ជនរងគ្រោះ តែពុំបានសម្រេចដោយជនរងគ្រោះបានដឹងខ្លួនទាន់ហើយទាញយកកាបូបស្ពាយទៅវិញ ចំណែកឈ្មោះ ប៉ុន ឧត្តម ជិះម៉ូតូបិទគូថពី ក្រោយនាំគ្នាគេចខ្លួនបាត់ ។
បច្ចុប្បន្នជនសង្ស័យ និងវត្ថុតាងខាងលើ ការិយាល័យកសាងសំណុំរឿងបញ្ជូនទៅសាលាដំបូងរាជធានីភ្នំពេញដើម្បីចាត់ការតាមនីតិវិធី ។
