បាត់ដំបង៖ នៅវេលាម៉ោង៩យប់ ថ្ងៃទី១៤ ខែកញ្ញា ឆ្នាំ២០២២ ពលរដ្ឋដើរក្បែររថយន្ត១គ្រឿងម៉ាកព្រុស (PRUISE) ពណ៌ទឹកប្រាក់ ចតក្រោមដើមក្ងោក ស្ថិតក្នុងបរិវេណ ខាងក្រោយផ្សារទំនើបភូពុយ ស្ថិតក្នុងភូមិអញ្ចាញ សង្កាត់អូរចារ ក្រុងបាត់ដំបង ខេត្តបាត់ដំបង មានធំខ្លិនស្អុយ បន្ទាប់មករាយការណ៍ទៅសមត្ថកិច្ចមូលដ្ឋានចុះទៅពិនិត្យ ស្រាប់តែប្រទះឃើញសពស្ត្រីម្នាក់ហើមស្អុយរលួយនៅក្នុងរថយន្តបង្កអោយមានការភ្ញាក់ផ្អើលដល់ ប្រជាពលរដ្ឋ អាជ្ញាធរនិងសមត្ថកិច្ចទាំងយប់។
សាកសពដែលពលរដ្ឋប្រទះឃើញនោះគឺនៅខាងក្នុងរថយន្ត ពាក់ស្លាកលេខ ភ្នំពេញ 2BQ-1371 សមត្ថកិច្ចហ៊ុព័ទ្ធខ្សែរក្សាទុក១យប់ រហូតដល់ព្រឹកថ្ងៃទី១៥ ខែកញ្ញា ឆ្នាំ២០២២ ដើម្បីធ្វើកោសល្យវិច្ច័យទៅលើ(សព)ស្ត្រីរងគ្រោះ។
ប្រភពព័ត៌មានពីសមត្ថកិច្ចបានអោយដឹងថា៖ជនរងគ្រោះឈ្មោះ បុិន សោភា អាយុ៣៤ឆ្នាំ មុខរបរលក់ដីឡូត៍និងសំអាងការ មានទីលំនៅក្នុងភូមិត្រពាំងជើង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ត្រូវបានជនមិនស្គាល់អត្តសញ្ញាណធ្វើឃាត ដោយកាច់បំបាក់ក រួចយកផ្លុងចោលនៅចំណុចខាងលើ។
បច្ចុប្បន្នសពស្ត្រីរងគ្រោះសមត្ថកិច្ចសម្រេចប្រគល់ជូនអោយក្រុមគ្រួសារ យកទៅបូជានៅវត្តឯករស្មី(ហៅ វត្តទួលតាឯក) ស្ថិតក្នុងភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង។
ចំពោះករណីឃាតកម្មនេះសមត្ថកិច្ចជំនាញកំពុងស្រាវជ្រាវ វែកមុខរកឃាតករ យកទៅផ្តន្ទាទោសតាមផ្លូវច្បាប់៕
ដោយ សុខ កុសល
