លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ នាំយកអំណោយមនុស្សធម៌របស់សម្ដេចតេជោ ហ៊ុន សែន ជូនលោកយាយ ដែលមានជីវភាពក្រីក្រ និងពិការភ្នែក នៅសង្កាត់ព្រែកលៀប
ភ្នំពេញ៖ លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ កាលពីរសៀលថ្ងៃទី០៩ ខែកញ្ញា ឆ្នាំ២០២២ បាននាំយគ្រឿងឧបភោគ បរិភោគ សម្ភារប្រើប្រាស់ និងថវិកាមួយចំនួនរបស់សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត តាមរយៈអភិបាលរាជធានីភ្នំពេញ ប្រគល់ជូនលោកយាយ យឹម យ៉ន ព្រះជន្ម ៩០ឆ្នាំ មានជីវភាពក្រីក្រលំបាក កំពុងមានជំងឺប្រចាំកាយដើរមិនរួច និងពិការភ្នែក រស់នៅភូមិបាក់ខែង សង្កាត់ព្រែកលៀប ខណ្ឌជ្រោយចង្វារ។
សូមជម្រាបជូនថា សម្ភារ និងថវិកាដែលបានផ្ដល់ជូន រួមមាន អង្ករចំនួន១០០គីឡូក្រាម មី០៥កេសតូច ទឹកសុទ្ធ ០៥កេស ទឹកត្រី០៣យួរ ទឹកស៊ីអ៊ីវ០៣ យួរ ត្រី ខ ០៥យួរ ប្រេងឆា០៥ ដប ភួយធំ០១ មុង០១ អាវរងារ០១ ក្រមា០១ និងថវិកា ១លានរៀល ។
ជាមួយគ្នានេះដែរ លោក ម៉េត មាសភក្តី បានលើកឡើងថា ឯកឧត្ដម ឃួង ស្រេង អភិបាលរាជធានីភ្នំពេញ នឹងធ្វើការឧបត្ថម្ភអង្ករជារៀងរាល់ខែជូនលោកយាយមិនឱ្យបារម្ភពីការដាច់ស្បៀង អាហារឡើយ៕
ប្រភព៖ AKP
