ភ្នំពេញ ៖ ជនសង្ស័យម្នាក់ដែលជាសន្តិសុខ យាមនៅខុនដូមួយកន្លែងយីហោ(TIME SQUARB)បានយកលួចម៉ូតូភ្ញៀវដែលស្នាក់នៅក្នុងខុនដូ យកទៅបាត់ មិនឃើញយកមកវិញ បង្កឲ្យមានការភ្ញាក់ផ្អើលកាលពីវេលាម៉ោង៦ និង៣០នាទីព្រលប់ ថ្ងៃទី០៣ ខែកញ្ញា ឆ្នាំ២០២២ នៅចំណុច ខុនដូយីហោ(TIME SQUARB) តាមបណ្ដោយផ្លូវ ៣១៧ សង្កាត់បឹងកក់ទី១ ខណ្ឌទួលគោក រាជធានីភ្នំពេញ។
ជនរងគ្រោះមានឈ្មោះ ផា វ:រុន ភេទប្រុស អាយុ២១ ឆ្នាំ មុខរបរសិស្ស ស្នាក់នៅខុនដូកើតហេតុខាងលើបន្ទប់លេខ១៣ ជាន់លេខ១៣ មានស្រុកកំណើត នៅឯស្រុកអូររាំងឪ ខេត្តត្បូងឃ្មុំ។ ចំណែកជនសង្ស័យមិនស្គាល់អត្តសញ្ញាណ ធ្វើជាសន្តិសុខយាមនៅខុនដូកើតហេតុដោយមិនដឹងថាជាសន្តិសុខរបស់ខុនដូ ឬជាសន្តិសុខក្រុមហ៊ុនឯកជន បានយកម៉ូតូជនរងគ្រោះម៉ាកហុងដាឌ្រីមសC-125 ពណ៌ខ្មៅស៊េរីឆ្នាំ ២០១៨ពាក់ស្លាកលេខភ្នំពេញ1GZ-2975។
បើតាមការរៀបរាប់ពីជនរងគ្រោះបានប្រាប់ឲ្យដឹងថាមុនកើតហេតុរូបគាត់បានចុះពីបន្ទប់ស្នាក់នៅមកអង្គុយលេងនៅខាងក្រោម មុខខុនដូ ហើយបាននិយាយគ្នាលេងជាមួយសន្តិសុខ មួយសន្ធុះ លុះដល់ម៉ោងកើតហេតុស្រាប់តែសន្តិសុខបានសូមខ្ចីសោរម៉ូតូរបស់គាត់ថាយកម៉ូតូទៅទិញបាយមួយភ្លែត តែរូបគាត់មិនឲ្យ ខណៈនោះសន្តិសុខរូបនោះបានឆក់យកសោរបស់គាត់រួចរត់សំដៅទៅយកម៉ូតូនៅកន្លែងចំណតសម្រាប់ទុកម៉ូតូ ហើយឡើងជិះយកទៅបាត់ ភ្លាមនោះរូបគាត់ ស្មានតែសន្តិសុខធ្វើលេង ក៏អង្គុយរង់ចាំយូទៅៗមិនឃើញត្រឡប់មកវិញដោយនឹកថាប្រាកដជា សន្តិសុខរូបនោះយកទៅបាត់មែន។
បន្ទាប់មកទេីបជនរងគ្រោះសម្រេចចិត្តទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលបឹងកក់ទី១ដើម្បីឲ្យសមត្ថកិច្ចជួយអន្តរាគមន៍ស្វែងរកម៉ូតូមកវិញ៕
