តុលាការ សម្រេចដាក់គុក ជនជាតិចិនម្នាក់ ករណីដឹកជញ្ជូន ជួញដូរគ្រឿងញៀនឆ្លងដែន ជាង១០០គីឡូក្រាម

ខេត្ដព្រះវិហារ៖ ដោយមានការចង្អុលបង្ហាញពីឯកឧត្តម ទី សុវិនថាល់ ព្រះរាជអាជ្ញាអមសាលាដំបូងខេត្តព្រះវិហារ បានចាត់ លោក វុធ សាវី ព្រះរាជអាជ្ញារង និងជាអ្នកនាំពាក្យនៃអយ្យការអមសាលាដំបូងខេត្តព្រះវិហារទទួលចាត់ការលើសំណុំរឿងគ្រឿងញៀនដ៏ក្តៅគគុកមួយនេះ ។

កម្លាំងផែនការងារប្រឆាំងគ្រឿងញៀន នៃស្នងការដ្ឋាននគរបាលខេត្តព្រះវិហារ សហការបង្ក្រាបខុសច្បាប់ បានឃាត់ខ្លួន ជនជាតិចិន ០១ នាក់ និងរឹបអូសគ្រឿងញៀនជាង១០០គីទ្បូក្រាម ។

នៅថ្ងៃទី៣០ ខែសីហា ឆ្នាំ២០២២ វេលាម៉ោង ១២ និង ៣២ នាទី ស្ថិតនៅចំណុចភូមិកំពង់ព្រះឥន្ធូ ឃុំកំពង់ស្រឡៅ២ ស្រុកឆែក ខេត្តព្រះវិហារ សមត្ថកិច្ចបានដកហូតគ្រឿងញៀនជាច្រើន ក្រោយមកអយ្យការអមសាលាដំបូងខេត្តព្រះវិហារបានដឹកនាំសម្របសម្រួលសមត្ថកិច្ចដើម្បីពន្លាតដែនសមត្ថកិច្ចបន្តរហូតធ្វើការឃាត់ខ្លួនជនសង្ស័យបាននៅឃុំបិតត្រាំង ស្រុកព្រៃនប់ ខេត្តព្រះសីហនុ ។

ទីបំផុត ជនសង្ស័យឈ្មោះ TU SUERONG ភេទ​ប្រុស អាយុ​៣៦​ឆ្នាំ ជនជាតិ​ចិន ត្រូវបានលោក វុធ សាវី ព្រះរាជអាជ្ញារង និងជាអ្នកនាំពាក្យនៃអយ្យការអមសាលាដំបូងខេត្តព្រះវិហារ សម្រេចធ្វើការចោទប្រកាន់ រួចបានបញ្ជូនជនសង្ស័យឈ្មោះ TU SUERONG ទៅចៅក្រមស៊ើបសួរ ។

លោកស្រី សម្ផស្ស មុទិតា ជាចៅក្រមស៊ើបសួរបានសម្រេចចេញដីកាបង្គាប់ឱ្យឃុំខ្លួនបណ្តោះអាសន្ន លើជនសង្ស័យខាងលើ ។

លទ្ធផល  ក្នុង​ប្រតិបត្តិការ​ខាងលើ សមត្ថកិច្ច​ជំនាញ ឃាត់ខ្លួន​ជនសង្ស័យ​០១​នាក់​ឈ្មោះ
ចំណែក​វត្ថុ​តាង​ចាប់​យក​បាន រួម​មាន ៖
-​កេ​តា​មីន​(KETAMINE) ១០០​ដុំ ស្មើ​ទម្ងន់ ១០០ គ​.​ក្រ និង​៨០​ក្រាម
-​រថយន្ត ០១​គ្រឿង
-​ទូរ​សព្ទ​ដៃ ០១​គ្រឿង​។
បច្ចុប្បន្ន ជនសង្ស័យ ត្រូវបានបញ្ជូនទៅពន្ធនាគារខេត្តព្រះវិហារ ។