បាត់ដំបង៖បុរសម្នាក់បានស្លាប់ភ្លាមៗនិងម្នាក់ទៀតរងរបួសធ្ងន់ករណីគ្រោះថ្នាក់ចរាចរណ៍បង្កឡើងដោយខ្លួនឯង។
ហេតុការណ៍នេះបានកើតឡើងកាលពីវេលាម៉ោង៩និង៤៥នាទីយប់ ថ្ងៃទី២៦ ខែ សីហា ឆ្នាំ២០២២ នៅតាមបណ្តោយផ្លូវជាតិលេខ57B ចំណុចក្រុមទី១២ ភូមិតាកយ ឃុំបន្សាយត្រែង ស្រុកថ្មគោល ខេត្តបាត់ដំបង ។
ប្រភពព័ត៌មានពីសមត្ថកិច្ចស្រុកថ្មគោលបានអោយដឹងថា៖រថយន្តដែលជួបគ្រោះថ្នាក់នោះគឺជាប្រភេទ រថយន្តដឹកទំនិញម៉ាកសាំងយ៉ុង ពណ៌ស ពាក់ផ្លាកលេខ ភ្នំពេញ2K-6487 បើកបរដោយឈ្មោះ សេង គី ភេទប្រុស អាយុ៣៦ឆ្នាំ និងអ្នករួមដំណើរ ឈ្មោះ មាស ខ្នា ភេទប្រុស អាយុ៣៤ឆ្នាំ អ្នកទាំងពីរមានទីលំនៅក្នុងក្រុងបាត់ដំបង ខេត្តបាត់ដំបង។
ប្រភពព័ត៌មានពីប្រជាពលរដ្ឋបានបន្តថា៖រថយន្ត១គ្រឿងនោះបើកបរក្នុងទិសដៅពីលិចទៅកើតបោះពួយយ៉ាងលឿន លុះទៅដល់ចំណុចកើតហេតុស្រាប់តែរ៉េចង្កូតចូលទៅចិញ្ចើមផ្លូវខាងឆ្វេងដៃ ជ្រុលទៅបុកដើមឈើពេញទំហឹងបណ្តាលអោយអ្នកបើកបរស្លាប់បាត់បង់ជីវិតមួយរំពេច។
ក្រោយពេលកើតហេតុសមត្ថកិច្ចជំនាញបានចុះទៅដល់ទីតាំងកើតហេតុនិងបញ្ជូនជនរងគ្រោះទៅសង្គ្រោះបន្ទាន់នៅមន្ទីរពេទ្យ ចំណែក(សព)ជនរងគ្រោះជាអ្នកបើកបរ សមត្ថកិច្ចប្រគល់អោយក្រុមគ្រួសារ យកទៅរៀបចំធ្វើបុណ្យតាមប្រពៃណី។
ចំណែករថយន្តត្រូវបានកម្លាំងនគរបាលជំនាញចរាចរណ៍ផ្លូវគោកស្ទូចយកទៅរក្សាទុកជាបណ្តោះអាសន្ននៅការិយាល័យ ចរាចរណ៍ខេត្តបាត់ដំបង៕ ដោយ ៖ សុខ កុសល
