ភ្នំពេញ ៖ ស្នូរសំឡេងផ្ទុះអាវុធចំនួន ១គ្រាប់ បង្កឲ្យមានការភ្ញាក់ផ្អើលដល់កម្លាំងអាវុធហត្ថខណ្ឌចំការមនចុះ អន្តរាគមន៍កាលពីវេលាម៉ោង ១ និង ២០ នាទីយប់រំលងអាធ្រាត្រឈានចូលថ្ងៃទី ២០ ខែសីហា ឆ្នាំ២០២២ នៅចំណុចមុខអាគារខុនដូរ មួយកន្លែង ខាងត្បូងរង្វង់មូលផ្សារដើមស្កូវ តាមបណ្ដោយផ្លូវ៤៣០ សង្កាត់ផ្សារដើមស្កូវខណ្ឌចំការមន រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញមានរថយន្ត បីគ្រឿងពីគ្រឿងមិនស្គាល់ម៉ាកនិងមួយគ្រឿងទៀតម៉ាកព្រូស ចំណែករថយន្តពីរគ្រឿងមិនស្គាល់ម៉ាក បានដឹកភ្ញៀវជនជាតិចិនមួយក្រុម រីឯរថយន្តព្រូស មិនមានដឹកភ្ញៀវនោះទេ ដោយបើកបរដោយបុរសម្នាក់ ដោយរថយន្តទាំងបីគ្រឿង បានធ្វើដំណើរ ទិសដៅពីជើងទៅត្បូង ខណះមកដល់ចំណុចកើតហេតុខាងលើ បានឈប់អេបខាងស្តាំដៃនៅចិញ្ចើមផ្លូវដោយបានដាក់ភ្ញៀវមួយក្រុមនោះចុះ ពេលភ្ញៀវកំពុងតែនាំគ្នាដើរចូលខុនដូរខាងលើ ស្រាប់តែគេឃើញមានបុរស់ម្នាក់បើករថយន្តធុនត្រាមួយគ្រឿងមិនចាំស្លាកលេខបានធ្វើដំណើរបញ្ច្រាសទិសដៅគ្នាពីត្បូងទៅជើងមកឈប់អេបក្បែររថយន្តកំពុងដាក់ភ្ញៀង ហើយដកកាំភ្លើងមិនស្គាល់ម៉ាក បាញ់ឡើងលើមួយគ្រាប់ រួចបើករថយន្តចេញទៅបាត់។
ប្រភពបន្តថា ភ្លាមៗនោះប្រជារដ្ឋបានរាយការណ៍ទៅកម្លាំងកងរាជអាវុធហត្ថខណ្ឌចំការមន ចុះមកអន្តរាគមន៍ នូវទីតាំងកន្លែងកើតហេតុ រួចបានប្រមូលយកសំបគ្រាប់ទុកប្រគល់ជូនជំនាញធ្វើការស្រាវជ្រាវបន្ត។
