លោក ឃឹម ហ្វីណង់ ៖ ធ្វេសប្រហែសតែបន្តិច ក្មេងតូច២នាក់បងប្អូនបង្កើត ត្រូវអោបគ្នាលង់ទឹកស្លាប់យ៉ាងគួរឱ្យសង្វេគ!

ខេត្តសៀមរាប៖ លោក ឃឹម ហ្វីណង់ អភិបាលស្រុកបន្ទាយស្រី លើកឡើងថា ធ្វេសប្រហែសតែបន្តិច ក្មេងតូច២នាក់បងប្អូនបង្កើតត្រូវអោបគ្នាលង់ទឹកស្លាប់យ៉ាងគួរឱ្យសង្វេគ! កូនស្រីសុំម្តាយទៅបេះផ្លែឈូក ហើយប្អូនប្រុសរត់ទៅតាមពីក្រោយ ជិះប៊ីដុងឆ្លងទឹក២នាក់បងប្អូនក៏បណ្តាលឱ្យលិចលង់ស្លាប់ដោយគ្មាននរណាឃើញ ទម្រាំតែឳពុកម្តាយដឹងរឿងដើររកកូន យឺតពេលបាត់ទៅហើយ។ កូនស្រីបងទើបតែអាយុ១២ឆ្នាំ និងប្អូនប្រុសអាយុ៧ឆ្នាំ ហើយគឺជាកូនតែ២នាក់គត់នៃគ្រួសារក្រីក្រមួយនៅក្នុងភូមិថ្មជល់ ឃុំត្បែង។

អភិបាលស្រុកបន្ទាយស្រី រូបនេះ បន្តថាវាជាអារម្មណ៍មួយដែលគ្មានឪពុកម្តាយណាអាចទទួលយកបាននោះទេ ហើយក៏មិនមែនជាពេលវេលាដែលត្រូវស្តីបន្ទោសទៅលើអ្នកណានោះដែរ តែហេតុការណ៍ដ៏អាក្រក់បែបនេះច្រើនតែកើតចេញពីការធ្វេសប្រហែស ដែលបណ្តាលមកពីការខ្វះខាតការយល់ដឹង និងការបណ្តែតបណ្តោយនៅក្នុងគ្រួសារដែលមានជីវភាពខ្វះខាតនោះឯង។ សោកស្តាយដែលរឿងបែបនេះនៅតែបន្តកើតមានម្តងហើយម្តងទៀត ជាពិសេសនៅតាមទីជនបទដាច់ស្រយាល ដែលឳពុកម្តាយភាគច្រើនមិនសូវបានយកចិត្តទុកដាក់ និងមិនមានពេលមើលថែកូនឱ្យបានដិតដល់។

លោក ឃឹម ហ្វីណង់ គូសបញ្ជាក់ថា ថ្មីៗនេះ រដ្ឋបាលស្រុកទើបតែបានបង្កើតកម្មវិធីបង្រៀនជំនាញហែលទឹកបឋមដើម្បីសង្គ្រោះជីវិត និងការយល់ដឹងនូវវិធានសុវត្ថិភាពនៃការជួយសង្គ្រោះអ្នកលង់ទឹកជូនដល់កុមារតូចៗនៅក្នុងសហគមន៍ដោយអត់គិតថ្លៃដែរ តែកម្មវិធីនេះទើបតែចាប់ផ្តើម ហើយក៏មិនទាន់មានលទ្ធភាពពង្រីកវិសាលភាពនៃការបង្រៀនឱ្យបានទូលំទូលាយទៅដល់ទូទាំងស្រុកនៅឡើយ ដូច្នេះគ្មានអ្វីក្រៅពីអំពាវនាវសុំដល់អាណាព្យាបាលដែលមានកូនតូចៗ ហើយរស់នៅក្នុងតំបន់ដែលមានទឹកអាចធ្វើឱ្យលង់បាន ត្រូវបង្កើតការប្រុងប្រយត្ន័ខ្ពស់ចំពោះកូនៗរបស់ខ្លួន ជាពិសេសនៅក្នុងរដូវវស្សាដែលតែងតែមានទឹកហូរខ្លាំង មិនត្រូវបណ្តោយឱ្យក្មេងៗលេងទឹកនោះទេ ទោះបីជាចេះហែលក៏ដោយក៏នៅតែមានហានិភ័យខ្លាំងដែរ។