បង្ហោះ TikTok «ចុយ វាប៉ូលិស! វាថា អញជក់វ៉ែប វាក៏ចាប់ដែរ! ប៉ូលិសក៏អញវៃដែរ! » ពេលនេះ…!

ខេត្តកំពត៖ កាលពីថ្ងៃទី ១៨ ខែសីហា ឆ្នាំ២០២២ ស្នងការដ្ឋាននគរបាលខេត្តកំពត បានឃើញវីដេអូខ្លីមួយ ដែលបានផ្សព្វ ផ្សាយថា «ចុយវាប៉ូលិស! វាថាអញជក់វ៉ែបវាក៏ចាប់ដែរ! ប៉ូលិសក៏អញវៃដែរ! » សកម្មភាព និងពាក្យសម្តីទាំងនេះគឺជាការប្រមាថដល់កងកម្លាំងនគរបាល យ៉ាងធ្ងន់ធ្ងរ ។

បន្ទាប់ពីទទួលបានព័ត៌មាននេះ កម្លាំងជំនាញ នៃស្នងការដ្ឋាននគរបាលខេត្តកំពត បានស្រាវជ្រាវរកឃើញបុគ្គលទាំងពីររូបនេះគឺមានឈ្មោះ

១. ឈ្មោះ ជិន វិឆៃ ភេទប្រុស អាយុ ២៤ឆ្នាំ មានមុខរបរជា បុគ្គលិកក្រុមហ៊ុន។
២. ឈ្មោះ តាំ ទិត្យសុធា ភេទប្រុស អាយុ ២២ឆ្នាំ មានមុខរបរជា បុគ្គលិកស្រាបៀរ (ផ្នែកលក់)។

ជាលទ្ធផលជនទាំងពីរនាក់ខាងលើ បានទទួលស្គាល់កំហុសរបស់ខ្លួន ហើយបានធ្វើកិច្ចសន្យាបញ្ឈប់ការប្រមាថដល់មន្ត្រីរាជការសាធារណៈ និងធ្វើវីដេអូសុំទោសជាសាធារណៈ ដល់មន្ត្រីនគរបាលជាតិ ហើយបានស្ម័គ្រចិត្តលុបវីដេអូនោះ ចេញពីគណនី TikTok របស់ខ្លួន។

លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរ បាលខេត្តកំពត បញ្ជាក់ថា យុវជនខាងលើ លេង TikTok ខុសរបៀប ជក់បារី electronic ដែលបានហាមឃាត់ និងប្រើ ពាក្យសំដី មិនសមរម្យ ធ្វើអោយប៉ះ ពាល់ដល់កំលាំង មាន សមត្ថកិច្ច មកធ្វើការអប់រំ នៅ អធិការក្រុងកំពត។ លោកឧត្តមសេនីយ៍ទោ ម៉ៅ ច័ន្ទមធុរិទ្ធ អរគុណដល់លោកវរសេនីយ៍ឯក ហោ វណ្ណា អធិការក្រុងកំពត និងសហការីទាំងអស់ ដែលធ្វើការបានឆាប់រហ័ស។