ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល សូមធ្វេីការបំភ្លឺឆ្លេីយតបជូនសាធារណជនទៅនឹងគេហទំព័រសារព័ត៌មាន «ស៊ីអិនធី ហតញូយ៍» ដែលបានចុះផ្សាយថា ទីតាំងបើកល្បែងស៊ីសងអនឡាញ ជល់មាន់ តាមកញ្ចក់ទូរទស្សន៍ កំពុងតែពេញនិយម នៅក្នុងភូមិត្រពាំងភូមិ ឃុំពើក ស្រុកអង្គស្នួល ប្រជាពលរដ្ឋសំណូមពរលោក មាន សំណាង អធិការស្រុកអង្គស្នួល ចាត់កម្លាំងចុះបង្ក្រាបផង។
ក្រោយពីទទួលបានព័ត៌មានភ្លាម លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានបញ្ជាឱ្យលោកវរសេនីយ៍ឯក មាន សំណាង អធិការនគរបាលស្រុកអង្គស្នួល ស្រាវជ្រាវករណីខាង។
ជាលទ្ធផល៖នៅថ្ងៃទី១៦ ខែសីហា ឆ្នាំ២០២២ វេលាម៉ោង១៤.០០នាទី លោកអធិការ បានបញ្ជាលោកអនុសេនីយ៍ឯក ស៊ីម ករុណា នាយប៉ុស្តិ៍នគរបាលរដ្ឋបាលពើក ដឹកនាំមន្រ្តីក្រោមឱវាទ ចុះទៅដល់ទីតាំងខាងលើម្ចាស់ទីតាំងឈ្មោះ ណែម ចន្នី ភេទស្រី អាយុ៣១ឆ្នាំ នៅភូមិត្រពាំងភូមិ ឃុំពើក ស្រុកអង្គស្នួល ខេត្តកណ្ដាល ម្ចាស់ទីតាំងមិននៅផ្ទះទេ។ ក្រោយកម្លាំងសមត្ថកិច្ចពិនិត្យជាក់ស្ដែង មិនមានឃើញបើកបញ្ចាំងមានជល់មាន់តាមកញ្ចក់ទូរទស្សន៍ឡើយ ឃើញមានតែឆ្នោតឡូតូ ក្រុមហ៊ុន ភី អេច វី សុី ធី អេ ២៨៨៨ ឯ.ក (ទ្បូតូ៨៨៨៨) ប៉ុណ្ណោះ។
ជាចំណាត់ការ : កម្លាំងប៉ុស្តិ៍នគរបាលរដ្ឋបាលពើក បានធ្វើការអប់រំនិងកិច្ចសន្យាដល់បុគ្គលិកឆ្នោតឡូតូខាងលើ មិនឱ្យមានបើកលេងល្បែងស៊ីសងខុសច្បាប់ អនឡាញតាមកញ្ចក់ទូរទស្សន៍ឡើយ ហើយគាត់បានឯកភាព។
ចំពោះទីតាំងខាងលើនេះមិនដែលឃើញលេងល្បែងស៊ីសងមាន់ជល់អនឡាញតាមកញ្ចក់ទូរទស្សន៍ទោះទេ ហើយក៏សមត្ថកិច្ចមិនដែលធ្លាប់ធ្វើកិច្ចសន្យាដែរ។
ដោយពិនិត្យឃើញអាជ្ញាបណ្ណអាជីវកម្មនោះហួសសុពលភាព សមត្ថកិច្ចបានផ្អាកជាបណ្តោះអាសន្ន រង់ចាំបន្តសុពលភាពអាជ្ញាបណ្ណថ្មីទើបអាចបើកដំណើរការវិញបាន។
អាស្រ័យហេតុនេះ សូមសាធារណជនដែលប្រេីប្រាស់បណ្តាញទំនាក់ទំនងសង្គម មេត្តាជ្រាបជាព័ត៌មាន៕
