ភ្នំពេញ៖ នាល្ងាចថ្ងៃទី១៦ តុលា ២០២២ នេះ លោក មាស តុលា ពិធីករ កម្មវិធី 60BOZZ លើកឡើងក្នុងគណនីហ្វេសប៊ុកផ្ទាល់ខ្លួនថា ៖ មហាជនសំណូមពរអោយក្រុមអ្នកស្ទូចត្រី អោយព្រលែងត្រីសណ្តាយដ៏ធំក្បាលចង់ប្រហែលខ្លួនមនុស្សចូលទន្លេវិញ ព្រោះត្រីនេះ ជាប្រភេទត្រីកម្រ និងជិតផុតពូជ ។ តាមរយៈវីដេអូឃ្លីបមួយ ដែលបានបង្ហោះនៅលេីគណនី tiktok ឈ្មោះ តាស្វិត កាលពីល្ងាចថ្ងៃទី១៦ ខែសីហា ឆ្នាំ២០២២នេះ បានបង្ហាញពីសកម្មភាពរបស់ក្រុមអ្នកជំនាញស្ទូចត្រី ស្ទូចបានត្រីសណ្តាយដ៏ធំមួយក្បាលនៅក្នុងទន្លេស្ទឹងត្រែង ហេីយត្រីសណ្តាយនោះមិនទាន់ងាប់នៅឡេីយទេ ។ ក្នុងវីដេអូដែលនោះ គេឃេីញក្រុមអ្នកសន្ទូចត្រីបានស្រែកហោរកញ្ចៀវសេីចក្អាកក្អាយ នៅពេលដែលស្ទូចត្រីដ៏កម្រនេះបាន ។ បន្ទាប់ពីបានទស្សនានូវវីដេអូឃ្លីបនោះហេីយ គេឃេីញមហាជនដែលនិយមចូលចិត្តលេងបណ្តាញសង្គម tiktok បាននាំគ្នាចូលទៅខមិន សំណូមពរអោយក្រុមអ្នកជំនាញស្ទូចត្រីទាំងនោះ ធ្វេីការព្រលែងត្រីសណ្តាយដ៏ធំនោះចូលទៅក្នុងទឹកទន្លេវិញទៅ ដេីម្បីថែរក្សាការពារត្រីដែលជិតផុតពូជប្រភេទនេះ ។ ទោះបីជាយ៉ាងណា គេនៅមិនទាន់ដឹងថា តេីក្រុមអ្នកជំនាញស្ទូចត្រីទាំងនោះ បានព្រលែងត្រីសណ្តាយដ៏ធំមួយក្បាលនោះចូលទៅក្នុងទន្លេវិញនៅឡេីយទេ បន្ទាប់ពីមានការសំណូមពរពីសំណាក់មហាជន ។
គួរបញ្ជាក់ផងដែរថា ត្រីសណ្តាយ ជាប្រភេទត្រីល្មោភស៊ី មិនចេះឆ្អែតដ៏ធំមួយ ដែលស៊ីសាច់ជាអាហារ និងធំលួត លាស់នៅតាមមាត់ច្រាំងទន្លេ អូរ ដែលមានដុះស្មៅ និង ភាគច្រើន វាលាក់ខ្លួននៅក្នុងរន្ធ ។
ត្រីសណ្តាយ ជាប្រភេទត្រីដែលមានសកម្មភាពយឺត ស្ងប់ស្ងាត់ ស្វែងរកចំណីនៅបាតទន្លេជ្រៅ ទឹកនឹង ឬទឹកហូរតិចៗ ព្រមទាំងនៅស្រទាប់បាតក្រោមមានភក់ ឬល្បាប់ជាដេីម ។ ត្រីសណ្តាយវ័យជំទង់ អាហារចម្បងរបស់ វា គឺសត្វល្អិត ចំណែកឯត្រីពេញវ័យ ស៊ីត្រីតូចៗ កំពិស ក្តាម ។ វាធ្វេីចរាចរ ផ្លាស់ទីចូលទៅក្នុងស្ទឹងតូចៗ ប្រឡាយ និងតំបន់លិចទឹក ក្នុង រដូវទឹកជំនន់ ដើម្បីពង – កូន ។ ជាទូទៅត្រីប្រភេទនេះ ពង ដាក់ជាប់នឹងរុក្ខជាតិដែលដុះក្នុងទឹក ឬស្មៅ ហើយវានឹងញាស់នៅក្នុងរយៈពេលបីថ្ងៃក្រោយ ។
នៅពេលកម្រិតទឹកជំនន់ទន្លេមេគង្គស្រកចុះ ត្រីសណ្តាយ ក៏វិលត្រឡប់ចូល មេគង្គ ឬដៃទន្លេធំៗវិញ ហេីយទីដែលវាស្នាក់ គឺនៅក្នុងអាងទឹកជ្រៅទាំងនោះ រហូតដល់រដូវទឹកជំនន់លើកក្រោយចូលមកដល់ ។ ត្រីសណ្តាយ ត្រូវបានគេកត់ត្រាចូលក្នុងបញ្ជីក្រហម IUCN Red List (Near Threatened) ជា ប្រភេទត្រីកំពុងឈានទៅរងការគំរាមកំហែងរងគ្រោះផុត ពូជក្នុងឆ្នាំ ២០១០ ។
គេសង្កេតឃេីញថា ក្នុងរយៈពេលប៉ុន្មានឆ្នាំចុងក្រោយនេះ ការប្រែប្រួលអាកាសធាតុ ការនេសាទហួសកម្រិត ការប្រេីប្រាស់ឧបករណ៍ខុសច្បាប់ ដោយប្រេីចរន្តអគ្គិសនីឆក់ ដែល គេនិយមហៅថា ឆក់ក្តៅ ឬឆក់ត្រជាក់ ដែលជាឧបករណ៍ នេសាទដ៏គ្រោះបំផុតសម្រាប់មច្ឆជាតិ និងការសាងសង់ ទំនប់វារិ អគ្គីសនី សុទ្ធតែជាបញ្ហាប្រឈមដល់កំណើតពួកវា ។ ទៅថ្ងៃអនាគត ប្រភេទត្រីមួយចំនួននៅក្នុងប្រទេសកម្ពុជា អាចនឹងឈានទៅផុតពូជ បើពុំមានការចូលរួមពីមជ្ឈដ្ឋាន ទូទៅ ដើម្បីថែរក្សាការពារធនធានមច្ឆជាតិរបស់យើងទាំងអស់គ្នាទេនោះ ៕
