ប៉ូលិស ថាចាប់ច្រឡំ តែប្រពន្ធជនសង្ស័យថា អស់ជាង មួយពាន់ ដុល្លារ ជាថ្នូរ ក្នុងការដោះលែង តើពិតទេ?

ខេត្តតាកែវ ៖  កាលពីយប់ថ្ងៃទី១២ ខែសីហា ឆ្នាំ២០២២ វេលាម៉ោងប្រហែល២៤និង០០នាទី កម្លាំងប្រចាំការនៅគោលដៅគាល់ស្ពានខាងលិចភ្នំសន្លុង ឃុំសន្លុង ស្រុកទ្រាំង ខេត្តតាកែវ បានធ្វើការឃាត់ខ្លួនជនសង្ស័យ២នាក់ ក្នុងនោះជនសង្ស័យម្នាក់មានដីកាតាមចាប់ខ្លួនពាក់ព័ន្ធករណីគ្រឿងញៀន ប្រភពច្បាស់ការមួយបានបញ្ជាក់ថា ជនសង្ស័យម្នាក់ត្រូវបានស្គាល់ឈ្មោះហេង ហាក់ ភេទប្រុស អាយុ៣៩ឆ្នាំ រស់នៅភូមិស្មោង ឃុំស្មោង ស្រុកទ្រាំង ខេត្តតាកែវ មានដីកាតាមចាប់ខ្លួនពាក់ព័ន្ធនិងគ្រឿងញៀនខុសច្បាប់។

ដោយឡែកជនសង្ស័យម្នាក់ទៀតមិនត្រូវបានស្គាល់ឈ្មោះនោះទេ ព្រោះមិនមានជាប់ពាក់ព័ន្ធសមត្ថកិច្ចក៏បានដោះលែងវិញភ្លាមៗ។

ប្រភពដដែលបានបន្តទៀតថា ក្រោយការឃាត់ខ្លួនជនសង្ស័យ ប្រពន្ធគាត់បានរត់រកលុយអ្នកជិតខាងទាំងយប់យកទៅឲ្យលោក ប៉ាត ម៉ាត អធិការរងទទួលបន្ទុកគ្រឿងញៀននៃអធិការដ្ឋាននគរបាលស្រុកទ្រាំង ដើម្បីដោះលែងប្តីខ្លួនមកផ្ទះវិញទីបំផុតជនសង្ស័យចាប់តាមដីកាត្រូវដោះលែងនៅម៉ោង១១ថ្ងៃត្រង់ថ្ងៃទី១៣ហើយលុយ១៥០០លោកប៉ាតម៉ាតយកជាថ្នូរនិងការលុបដីការចាប់ខ្លូនរបស់សាលាដំបូងខេត្តតាកែវ។

ជុំវិញករណីខាងលើនេះ លោក ឃុត ភិន អធិការនគរបាលស្រុកទ្រាំង បានឲ្យដឹងនៅព្រឹកថ្ងៃទី១៥ ខែសីហា ឆ្នាំ២០២២ តាមរយៈការហៅទូរស័ព្ទថា កម្លាំងប្រចាំការគោលដៅគាល់ស្ពានខាងលិចភ្នំសន្លុង ស្រុកទ្រាំង ពិតជាបានចាប់ឃាត់ខ្លួនជនសង្ស័យ២នាក់មែននៅយប់ថ្ងៃទី១២ តែចាប់ច្រឡំ មិនមែនជនសង្ស័យឈ្មោះ ហេង  ហាក់ ដែលមានដីកាតាមចាប់ខ្លួននោះទេ ហើយក៏បិទទូរស័ព្ទទៅ។

មហាជនមានចម្ងល់ថា បើប៉ូលីស ចាប់ច្រឡំហេតុអ្វីបានជាប្រពន្ធជនសង្ស័យឈ្មោះ ហេង ហាក់ រត់រកលុយទាំងយប់ផ្អើលអ្នកភូមិ ដើម្បី យកទៅអធិការដ្ឋាន៕ ដោយ៖ បងខ្មៅ