សម្ដេចក្រឡាហោម ស ខេង ៖ បច្ចុប្បន្ន ពិភពលោកទាំងមូល មិនត្រឹមតែមិនទាន់ស្រាកស្រាន្តពីជំងឺកូវីដ-១៩ ប៉ុណ្ណោះទេ ប៉ុន្ដែថែមទាំងទទួលរងនូវផលប៉ះពាល់បន្ថែមទៀត ដោយថាសង្គ្រាម រវាងអ៊ុយក្រែន និងរុស្ស៊ី…!
ភ្នំពេញ៖ នារសៀលថ្ងៃទី១១ ខែកក្កដា ឆ្នាំ២០២២នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញជាអធិបតីដ៏ខ្ពង់ខ្ពស់ក្នុងទិវាប្រជាជនពិភពលោក ១១កក្កដា លើកទី៣៣ ក្រោមប្រធានបទ «ពិភពលោកមួយដែលមានប្រជាជន ៨ប៊ីលាននាក់ ឆ្ពោះទៅរកអនាគតដែលមានភាពធន់ដើម្បីចាប់យកឱកាស និងធានាសិទ្ធិ និងជាជម្រើសសម្រាប់ទាំងអស់គ្នា»។
នាឱកាសនោះ ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្រ្តី រដ្ឋមន្រ្តីក្រសួងផែនការ បានធ្វើរបាយការណ៍ជូន សម្ដេចក្រឡាហោម ស ខេង និងអង្គពិធីថា ទិវាប្រជាជនពិភពលោក ១១ កក្កដា បានប្រារព្ធឡើងដោយផ្ដើមចេញពីគំនិតចង់ស្វែងយល់ឱ្យកាន់តែស៊ីជម្រៅអំពីបញ្ហាប្រជាជននៅក្នុងពិភពលោក ហើយថាផ្អែកលើមូលដ្ឋាននេះ ក្រុមប្រឹក្សាភិបាលនៃកម្មវិធីអភិវឌ្ឍអង្គការសហប្រជាជាតិ បានកំណត់យកថ្ងៃទី១១កក្កដា ឆ្នាំ១៩៨៩ ដើម្បីប្រារព្ធទិវានេះជាលើកដំបូង និងបានណែនាំឱ្យរដ្ឋសមាជិកប្រារព្ធទិវានេះជារៀងរាល់ឆ្នាំ ដោយចាត់ទុកប្រជាជនជាមធ្យោបាយចុងក្រោយនៃការអភិវឌ្ឍ និងគោលដៅចុងក្រោយនៃការអភិវឌ្ឍ។
ឯកឧត្តមទេសរដ្ឋមន្រ្តី បន្តថា នៅឆ្នាំនេះ ទិវានេះបានប្រារព្ធឡើងក្រោមប្រធានបទ «ពិភពលោកមួយដែលមានប្រជាជន៨ប៊ីលាននាក់ ឆ្ពោះទៅរកអនាគតដែលមានភាពធន់ ដើម្បីចាប់យកឱកាស និងធានាសិទ្ធិ និងជម្រើសសម្រាប់ទាំងអស់គ្នា»។ ឯកឧត្តម បន្តថា ប្រធានបទនេះពិតជាឆ្លើយតបស្ថានភាពជាក់ស្ដែងនៃប្រជាជនក្នុងពិភពលោក ដោយសារអត្រាមរណភាពមានការធ្លាក់ចុះជាងមុន ហើយមនុស្សរស់នៅមានអាយុវែងជាងមុន និងសុខភាពល្អប្រសើរ។
អញ្ជើញមានប្រសាសន៍នាឱកាសនោះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ដ្រីក្រសួងមហាផ្ទៃ បានរំលឹកថា ក្នុងរយៈពេលជាងពីរឆ្នាំកន្លងមកនេះពិភពលោកទាំងមូលបាននិងកំពុងឆ្លងកាត់វិបត្តិ និងការលំបាកធ្ងន់ធ្ងរមិនធ្លាប់ជួបប្រទះពីមុនបណ្ដាលមកពីការរីករាលដាល នៃជំងឺកូវីដ-១៩ ក្នុងនោះកម្ពុជាក៏បានរងផលប៉ះពាល់ និងជះឥទ្ធិពលអវិជ្ជមានទៅលើការអភិវឌ្ឍគ្រប់វិស័យទាំងអស់ ជាពិសេសវិស័យសុខាភិបាលវិស័យអប់រំ វិស័យទេសចរណ៍ និងវិស័យផលិតកម្មអតិពលកម្ម ធ្វើឱ្យសេដ្ឋកិច្ចមានការធ្លាក់ចុះ។
សម្ដេចក្រឡាហោម បានបន្ដថា ឆ្លើយតបទៅនឹងវិបត្តិនេះ រាជរដ្ឋាភិបាលកម្ពុជា បានដាក់ចេញនូវវិធានការគោលនយោបាយនានា ដើម្បីរក្សាស្ថិរភាពម៉ាក្រូសេដ្ឋកិច្ច រក្សាស្ថិរភាពនៃកម្រិតជីវភាពរបស់ប្រជាជននឹងផ្តល់ការឧបត្ថម្ភគាំទ្រថវិកា ដល់គ្រួសារក្រីក្រ និងងាយរងគ្រោះ ហើយវិធានការគោលនយោបាយទាំងនេះ រួមមាន ការធ្វើអន្តរាគមន៍លើវិស័យសុខាភិបាល សង្គមកិច្ច សេដ្ឋកិច្ចដើម្បីកាត់បន្ថយផលប៉ះពាល់ផ្ទាល់ និងប្រយោល ក្នុងនោះការចាក់វ៉ាក់សាំងក៏ជាវិធានការគន្លឹះដ៏មានប្រសិទ្ធភាព។
យ៉ាងណាក៏ដោយ សម្ដេចក្រឡាហោម ស ខេង បានបន្ថែមទៀតថា បច្ចុប្បន្នពិភពលោកទាំងមូលមិនត្រឹមតែមិនទាន់ស្រាកស្រាន្តពីជំងឺកូវីដ-១៩ ប៉ុណ្ណោះទេ ប៉ុន្ដែថែមទាំងទទួលរងនូវផលប៉ះពាល់បន្ថែមទៀត ដោយថាសង្គ្រាម រវាងអ៊ុយក្រែន និងរុស្ស៊ី ដែលកំពុងតែបន្តនៅឡើយ និងបាននាំឱ្យមានកំណើនតម្លៃប្រេងឥន្ធនៈ ការខ្វះខាតស្បៀងអាហារ ភាពរអាក់រអួលនៃខ្សែសង្វាក់ផ្គត់ផ្គង់ និងអតិផរណាសកលក៏ដូចជាភាពមិនប្រាកដប្រជានៃភូមិសាស្ត្រនយោបាយ សេដ្ឋកិច្ច និងបរិស្ថាន ដែលកំពុងជះឥទ្ធិពលដល់ជីវភាពរស់នៅរបស់ប្រជាជនលើពិភពលោកទាំងមូលជាពិសេសជីវភាពរស់នៅរបស់ក្រុមជនងាយរងគ្រោះ។
លេីសពីនេះទៀត សម្ដេចក្រឡាហោម ស ខេង ក៏បានសម្ដែងក្ដីបារម្ភថា បញ្ហាទាំងនោះ នឹងធ្វើឱ្យគោលដៅអភិវឌ្ឍន៍ប្រកបដោយចីរភាពសកល ជាពិសេស ការមិនទុកឲ្យនរណាម្នាក់ នៅឯការប្រហែលជានឹងមិនអាចសម្រេចបានឡើយរហូតដល់ឆ្នាំ២០៣០ ប្រសិនបើស្ថានភាពដូចបច្ចុប្បន្ននៅតែបន្តអូសបន្លាយ ខណៈកម្ពុជាជាប្រទេសហត្ថលេខីមួយដែលបានចុះលេខាទទួលយកកម្មវិធីសកម្មភាពនៃសន្និសីទអន្តរជាតិស្ដីពីប្រជាជន និងអភិវឌ្ឍន៍មកអនុវត្ត ដោយបានដាក់បញ្ចូលបញ្ហាប្រជាជនទៅក្នុងផែនការអភិវឌ្ឍគោលនយោបាយ និងយុទ្ធសាស្ត្រជាតិសំខាន់សំខាន់។
សម្ដេចក្រឡាហោម បានអះអាងជាថ្មីម្តងទៀតថា រាជរដ្ឋាភិបាលកម្ពុជា សូមប្ដេជ្ញាចិត្តបន្តគាំទ្រ កម្មវិធីសកម្មភាព នៃសន្និសីទអន្តរជាតិ ស្ដីពីប្រជាជន និងអភិវឌ្ឍសំដៅសម្រេចឲ្យបាននូវគោលដៅអភិវឌ្ឍន៍ប្រកបដោយចិរភាពសកលឆ្នាំ២០៣០ ក៏ដូចជាគោលដៅអភិវឌ្ឍន៍ប្រកបដោយចិរភាពកម្ពុជាដែលមិនទុកចោលនរណាម្នាក់ដើម្បី សុខុមាលភាពរបស់កូនចៅជំនាន់ក្រោយរបស់យើងឆ្ពោះទៅរកអនាគតមួយដែលមានភាពធន់ដើម្បីចាប់យកឱកាស និងធានាសិទ្ធិនិងជម្រើសសម្រាប់ទាំងអស់គ្នា៕
ដោយ ៖ នាយកដ្ឋានព័ត៌មានវិទ្យា
