ភ្នំពេញ៖ បន្ទាប់ពីបានឃេីញព័ត៌មានតាមបណ្តាញសង្គមស្តីពីគ្រួសារទុរគតជនពីរនាក់ប្តីប្រពន្ធភ្លាមៗនោះ នៅព្រលប់ថ្ងៃទី ២៥ ខែមិថុនា ឆ្នាំ២០២២នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងសហការី ចុះសួរសុខទុក្ខ និងនាំយកអំណោយមនុស្សធម៌ជាគ្រឿងឧបភោគបរិភោគ សម្ភារប្រេីប្រាស់ និងថវិកាចំនួន ៥លានរៀល ដល់គ្រួសារទុរគតពីរនាក់ប្តីប្រពន្ធរស់នៅក្នុងរោងទ្រុឌទ្រោម នៅភូមិត្រាចទោល ឃុំបែកចាន ស្រុកអង្គស្នួល ខេត្តកណ្តាល។
គ្រួសារខាងលេីនេះមានប្រពន្ធឈ្មោះ ផង់ ជា អាយុ ៥៦ឆ្នាំ មានជំងឺប្រចាំកាយ និងប្តីឈ្មោះ ពេជ្រ សុខា អាយុ ៥១ឆ្នាំ ធ្វេីជាជាងសំណង់ដេីម្បីផ្គត់ផ្គង់ជីវភាពគ្រួសារ។ ចំណែកឯកូនប្រុសស្រីទាំង២នាក់ ធ្វេីការនៅរោងចក្រ ហេីយសុទ្ធតែមានគ្រួសាររៀងៗខ្លួន។
ក្នុងឱកាសនោះ លោកជំទាវអគ្គលេខាធិការរងទី១ បានពាំនាំនូវប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ និងក្តីអាណិតអាសូរចំពោះគ្រួសារអ្នកទាំងពីរ។ លោកជំទាវ បានបញ្ជាក់ថា ៖ «សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បន្ទាប់ពីបានឃេីញព័ត៌មានករណីគ្រួសារមួយនេះ សម្តេច បានសម្តែងនូវក្តីអាណិតអាសូរ និងបានចាត់ឱ្យក្រុមការងារចុះភ្លាមៗដេីម្បីជួយសម្រាលការលំបាកក្នុងជីវភាព និងជាការលេីកទឹកចិត្តដល់គ្រួសារប្តីប្រពន្ធខាងលេី ឱ្យខិតខំតស៊ូប្រឹងប្រែងតទៅមុខទៀត ហេីយការផ្តល់អំណោយនាពេលនេះ នឹងអាចកែប្រែជីវភាពឱ្យបានល្អប្រសេីរជាងមុន»។ ជាមួយគ្នានេះ លោកជំទាវ ក៏បានផ្តាំផ្ញេីឱ្យថែទាំសុខភាពឱ្យបានល្អ រស់នៅមានអនាម័យស្អាត ហេីយចំពោះកូនៗវិញ ត្រូវមេីលថែទាំឪពុកម្តាយឱ្យបានល្អដេីម្បីភាពកក់ក្តៅនៅក្នុងគ្រួសារ។
ជាកិច្ចឆ្លេីយតប ក្រុមគ្រួសារខាងលេី បានសម្តែងនូវក្តីរំភើបក្តុកក្តួល ឥតឧបមា និងដឹងគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានគិតគូរ និងលើកទឹកចិត្តឱ្យមានក្តីសង្ឃឹមតទៅមុខទៀត រួមជាមួយអំណោយមនុស្សធម៌ជួយសម្រាលការលំបាក រួមមានស្បៀងអាហារ សម្ភារប្រើប្រាស់ និងថវិកាទៀតផង៕
