ខេត្តព្រះសីហនុ៖ សមត្ថកិច្ចបំបែកសំណុំរឿងឃាតកម្ម ប្តីសម្លាប់ប្រពន្ធខ្លួនឯងនៅក្រុងព្រះសីហនុ ដែលជនជាតិចិនដូចគ្នា និងឃាត់ខ្លួនបុរសជាប្តីបានហើយ។
លោកអធិការនគរបាលក្រុងព្រះសីហនុឲ្យដឹង ថាក្រោយមានស្ត្រីម្នាក់ស្លាប់នៅលើដីក្បែរសណ្ឋាគារសមុទ្រខៀវក្នុងសង្កាត់លេខ៣ក្រុងព្រះសីហនុកាលពីព្រឹកថ្ងៃទី១៣មិថុនា២០២២ សមត្ថកិច្ចចម្រុះរួមមាននគរបាលនិងកងរាជអាវុធហត្ថ ដឹកនាំសម្របសម្រួលផ្លូវច្បាប់ពីស្ថាបន័អយ្យការអមសាលាដំបូងខេត្តព្រះសីហនុ បានបើកការស្រាវជ្រាវនិងរកឃើញថា នេះជាករណីឃាតកម្មបង្កឡើងដោយបុរសជាប្តីសម្លាប់ភរិយាខ្លួនឯង ក្នុងពេលមានជម្លោះ ឈ្លោះប្រកែកគ្នា ដោយបុរសជាប្តីយកកាំបិតចាក់ប្រពន្ធខ្លួនឯងរួចលើកបោះទម្លាក់ពីអាគារខ្ពស់មកដី ខាងក្រោមបណ្តាលឲ្យស្ត្រីរងគ្រោះស្លាប់នៅនឹងកន្លែង ហើយនៅថ្ងៃទី១៤ ខែមិថុនា ឆ្នាំ២០២២នេះ សមត្ថកិច្ចបានឃាត់ខ្លួនជនសង្សយ័ជាប្តីនាំយកមកចាត់ការបន្តតាមនិតិវិធី។ ស្ត្រីរងគ្រោះជាភរិយាដែលស្លាប់មានឈ្មោះ Ran Wei Xia អាយុ៣០ ឆ្នាំ មានមុខរបរ ធ្វើការក្នុងក្លឹបចំណែកជនសង្ស័យឈ្មោះ Hao Hong Wei ភេទប្រុស អាយុ២៤ ឆ្នាំ មុខរបរមិនពិតប្រាកដ ។
លោកអធិការនគរបាលក្រុងព្រះសីហនុបញ្ជាក់បន្ថែមថា ជម្លោះហឹង្សារវាងប្តី និងប្រពន្ធជនជាតិចិននេះ កើតឡើងកាលពីថ្ងៃទី១៣ ខែមិថុនា ឆ្នាំ២០២២ នៅលើអគារស្នាក់នៅ ក្នុងសណ្ឋាគារសមុទ្រខៀវ នៅក្រុម១ ភូមិ១ សង្កាត់៣ ក្រុងព្រះសីហនុ ពេលឈ្លោះប្រកែកគ្នា បុរសជាប្តីប្រើប្រាស់កាំបិតចុងស្រួចចាក់ទៅលើប្រពន្ធ រួចលើកស្ត្រីជាប្រពន្ធបោះទម្លាក់ពីលើអគារមកដល់ដីបណ្តាលឲ្យស្លាប់ភ្លាមៗ ហើយករណីនេះនគរបាលជំនាញកំពុងបន្តនិតិវិធីនាំយកទៅផ្តន្ទាទោសតាមផ្លូវច្បាប់៕
