បាត់ដំបង៖ ជនសង្ស័យម្នាក់ឈ្មោះ ភាព សុផៃ ភេទប្រុស អាយុ៤៦ឆ្នាំ មានទីលំនៅក្នុងភូមិស្លាកែត សង្កាត់ស្លាកែត ក្រុងបាត់ដំបង ខេត្តបាត់ដំបង ត្រូវបានកម្លាំងនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលខេត្តបាត់ដំបងស្ទាក់ឃាត់ខ្លួន បន្ទាប់ពីលួចម៉ូតូប្រជាពលរដ្ឋអស់ចំនួន២គ្រឿង។
ជនសង្ស័យបានធ្វើសកម្មភាពចូលលួច ម៉ូតូ របស់ជនរងគ្រោះឈ្មោះ ទូច និស្ស័យភេទប្រុស អាយុ២៩ឆ្នាំ រស់នៅភូមិស្លាកែត សង្កាត់ស្លាកែត ក្រុងបាត់ដំបង ខេត្តបាត់ដំបង កាលពីវេលាម៉ោង១រសៀល ថ្ងៃទី១៨ ខែឧសភា ឆ្នាំ២០២២ (ដោយកាត់ តខ្សែភ្លើង)លួចយកម៉ូតូរួចគេចខ្លួនបាត់។
ប្រភពព័ត៌មានពីលោកវរសេនីយ៍ឯកឈឿង គឹមសុង ប្រធានការិយាល័យព្រហ្មទណ្ឌកំរិតស្រាល នៃស្នងការដ្ឋាននគរបាលខេត្តបាត់ដំបងបានអោយដឹងថា៖ជនសង្ស័យត្រូវបានឃាត់ខ្លួនកាលពីវេលាម៉ោង១និង២៩នាទី រំលងអាធ្រាតឈានចូល ថ្ងៃទី១៩ ខែឧសភា ឆ្នាំ២០២២ ចំណុចភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង។
វត្ថុតាងដែលសមត្ថកិច្ចដកហូតបានរួមមាន៖១-ម៉ូតូម៉ាកហុងដា Zoomer X ពណ៌ក្រហម សេរីឆ្នាំ២០១៧ ពាក់ស្លាកលេខ បាត់ដំបង 1AD-6764 ១គ្រឿង ២-ម៉ូតូម៉ាក ហុងដា Zoomer X ពណ៌បៃតង លាយស សេរីឆ្នាំ២០១៧ ១គ្រឿងទៀត ពាក់ស្លាកលេខ បាត់ដំបង1AB-7332 មេសោរ១ តួណឺវីស ១ ដង្កាប់១និងកូនសោរចំនួន១ផងដែរ ម៉ូតូទាំងពីរគ្រឿងដែលសមត្ថកិច្ចដកហូតបាននោះគឺជាកម្មសិទ្ធិរបស់ជនរងគ្រោះ។
ប្រតិបត្តិការ បង្ក្រាបនិងឃាត់ខ្លួនជនសង្ស័យខាងលើ លោក វរសេនីយ៍ឯកឈឿង គឹមសុង អនុវត្តតាមបទបញ្ជាពីលោក ឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបងនិងលោកកែវ សុជាតិ ព្រះរាជអាជ្ញា នៃអយ្យការ អមសាលាដំបូងខេត្តបាត់ដំបង ទើបឈានដល់ការឃាត់ខ្លួនជនសង្ស័យ។
បច្ចុប្បន្នជនសង្ស័យនិងម៉ូតូ ត្រូវបានកម្លាំងនគរបាលជំនាញកំពុងរៀបចំសំណុំរឿងបញ្ជូនទៅសាលាដំបូង ខេត្តបាត់ដំបង ដើម្បីចាត់ការបន្តតាមផ្លូវច្បាប់៕ ដោយ សុខ កុសល
